Անցած գիշեր ինչ-որ մարդկանց կողմից քանդվել են Մաշտոցի պողոտայում գտնվող «Ֆրեշ» սուպերմարկետի դիմացի այգու շատրվանները: Ըստ տեղեկությունների, շատրվանների քանդման աշխատանքների նախաձեռնողը հենց սուպերմարկետի տերերն են, որոնք պատրաստվում են այդ հատվածում ավտոկայանատեղի հիմնել: Երեկ «Առավոտը» Երեւանի քաղաքապետարանից հետաքրքրվեց, թե ինչո՞ւ են քանդվում շատրվանները, տեղում ի՞նչ է կառուցվելու եւ արդյո՞ք կառուցապատողն ունի շինաշխատանքներ իրականացնելու թույլտվություն:
Քաղաքապետարանի տեղեկատվության եւ հասարակության հետ կապերի վարչությունից «Առավոտին» պարզաբանեցին, որ շատրվանների քանդման աշխատանքներն անօրինական են եղել, եւ շինթույլտվություն չունենալու պատճառով Երեւանի քաղաքապետարանի աշխատակազմի հողի վերահսկողության վարչության կողմից դադարեցվել են։ Որ շատրվանները գաղտագողի են քանդվել, պարզ է դառնում հենց միայն այն բանից, որ դրանք քանդվել են գիշերով՝ ավելորդ աղմուկից խուսափելու համար: Սակայն նույնիսկ գիշերով քանդելու ժամանակ հարակից շենքերի բնակիչներին աղմուկն անհանգստացրել է:
