![\"\"](\"https://www.aravot.am/2010/aravot_arm/January/14/p12.jpg\")
Ատլանտյան օվկիանոսի Կարիբյան ավազանում, Հայիթի կղզում տեղի է ունեցել աննախադեպ մասշտաբների երկրաշարժ, որի արդյունքում, բացի ավերածություններից, կան զոհեր, վիրավորներ եւ անհայտ կորածներ, որոնց թվում են նաեւ Հայիթիում ՄԱԿ-ի խաղաղապահ առաքելության (որի շտաբ-բնակարանը գտնվում էր այս կղզում) ներկայացուցիչները եւ առաքելության ղեկավարը: Այդուհանդերձ, զոհերի, վիրավորների եւ անհայտ կորածների թվի մասին որեւէ ստույգ տեղեկություններ դեռ չկան: Նախնական տվյալներով, ավերակների տակ են մնացել հազարավոր մարդիկ: Ընդհանուր տվյալներով՝ ավելի քան երեք միլիոն մարդ է տուժվել (զոհվել, վիրավորվել, անտուն մնացել) ավելի քան 40, այդ թվում՝ երկու շատ ուժգին ցնցման արդյունքում: Միայն Հայիթիի մայրաքաղաք Պորտ-օ-Պրենսում, որտեղ ապրում էր 2 մլն մարդ, եւ կար ավելի քան 200 հազար շինություն, չի մնացել երկրաշարժից չտուժած եւ ոչ մի շենք: Հայիթիում տեղի ունեցած ողբերգությունը միավորել է անգամ երկու երդվյալ թշնամիներին՝ ԱՄՆ նախագահ Օբամային եւ Վենեսուելայի նախագահ Չավեսին: Նրանք հայտարարել են Հայիթիին պետական օգնություն տրամադրելու իրենց պատրաստակամության մասին: Նույնկերպ վարվել են նաեւ այլ երկրներ, այդ թվում՝ նաեւ Ռուսաստանը:
