![\"\"](\"https://www.aravot.am/2010/aravot_arm/January/14/p13.jpg\")
Իրանի խորհրդարանը քննարկել է Մեծ Բրիտանիայի հետ դիվանագիտական հարաբերությունները խզելու հարցը: Թեհրանի եւ Լոնդոնի միջեւ հարաբերությունները խզելու վերաբերյալ օրինագծի տակ ստորագրել է Իրանի խորհրդարանի 36 պատգամավոր:
Այդ մասին տեղեկացնում է News.am-ը՝ վկայակոչելով իրանական «Մեհր» գործակալությունը: Ներկայումս նախագիծը քննարկվում է արտաքին քաղաքականության եւ անվտանգության հանձնաժողովում, որից հետո այն դրվելու է քվեարկության:
Նախագծում նշվում է, որ Երկրորդ համաշխարհային պատերազմից հետո Մեծ Բրիտանիան միջամտել է Իրանի ներքին գործերին՝ 1953 թ.-ին առնչություն է ունեցել Մուսադիգի կառավարությունը գահընկեց անելուն:
Հիշեցնենք, որ Իրանի պաշտոնյաները բազմիցս են մեղադրել Մեծ Բրիտանիային՝ Իրանի ներքին գործերին միջամտելու մեջ: 2009թ. հունիսի 12-ին կայացած նախագահական ընտրություններից հետո Իրանի իշխանությունները լրտեսության եւ երկրի ներքին իրավիճակը ապակայունացնելու, երկրի ներսում ճգնաժամը խորացնելու փորձերի մեղադրանքներով ձերբակալել էին Բրիտանիայի դեսպանատան մի քանի իրանցի աշխատակիցների:
