Համաշխարհային ճգնաժամը Արագածոտն չի՞ հասել
Ինչպես միշտ, անցած 2009 թվականին էլ «Առավոտը» ներկայացրել է մեր իրականության բացերը, թերություններն ու ցավոտ կողմերը: 2009-ին չարաշահումների եւ բացթողումների հարթությունում մեր դիտարկումներով առաջատար էին Շիրակը, Կոտայքը եւ Սյունիքը: Բայց Ամանորը տարին մեկ առկայծող հույս է, եւ մարզպետներն էլ են շնորհավորական ուղերձներ հղել: Ահա թե ինչ են մաղթել մարզպետները ՀՀ քաղաքացիներին:
ՀՀ միակ կին մարզպետ Լիդա Նանյանը (Շիրակ) խաղաղություն, առողջություն, անսահման սեր, ընտանեկան երջանկություն եւ վաղվա օրվա նկատմամբ հավատ է ցանկացել եւ հավաստիացրել, որ «2010 թվականի մայիսին արդեն 1056 անօթեւաններ իրենց գլխավերեւում կունենան բարեկարգ սեփական տանիք: Նոր տարում եւս Շիրակի մարզի բնակչության հիմնահարցերը լինելու են պետության ուշադրության կենտրոնում: Հուսով եմ, որ 2010 թվականը մեր մարզի տնտեսության ու ժողովրդի համար լինելու է զարգացման տարի, եւ թող այն բոլորիս համար դառնա նոր հաջողությունների ու ձեռքբերումների տարի»:
Վերջին յոթ տարում՝ փոխմարզպետ, իսկ 2009-ից՝ Արագածոտնի մարզպետ Սարգիս Սահակյանը վստահ է, որ «2009 թվականը ամենահաջողներից էր: Իշխանությունների գործունեության հիմնական ուղղություններն էին անվտանգության, տնտեսության, սոցիալական ոլորտի եւ ժողովրդավարության ամրապնդումը»: Սարգիս Սահակյանի ուղերձից տպավորություն է ստեղծվում, թե նա տեղյակ չէ ճգնաժամից, քանի որ հայտարարել է՝ «պահպանվեց տնտեսական աճի բարձր տեմպը: Դա թույլ տվեց ավելի մեծ միջոցներ ուղղել սոցիալական հարցերի վրա, որոնցից գլխավորը աղքատության հաղթահարումն է: 2010 թվականը նույնպես հաջող է լինելու: Պետք է սթափ գնահատել, որ դեռ շատ անելիքներ կան: Դա առաջին հերթին կյանքի որակի բարձրացումն է: Մեր քաղաքացիներն արժանի են եւ պետք է ավելի լավ ապրեն: Մեր երկիրը եւ նրա քաղաքացիությունը պետք է հպարտության առարկա լինեն յուրաքանչյուր հայի համար»: Արագածոտնի մարզպետը քաղաքացիներին երջանկություն, խաղաղություն, լիություն եւ արդարություն, լուրջ ու ծանրակշիռ հաջողություններ, սոցիալական ճնշվածությունից, իրավական բոլոր տեսակի ոտնձգություններից ազատագրում, վստահ եւ բարեկեցիկ կյանք է ցանկացել:
ՀՀ ամենաերկարակյաց մարզպետը՝ Տավուշի ղեկավար Արմեն Ղուլարյանը առողջություն, ուժ, եռանդ, խաղաղություն, նոր հաղթանակներ է մաղթել եւ, ի տարբերություն Արագածոտնի մարզպետի, տեղյակ է, որ ճգնաժամ կա: «Չնայած ֆինանսական ճգնաժամն իր շտկումները մտցրեց հանրապետության տնտեսության մեջ, Տավուշի մարզում անցնող տարում բավականին ծրագրեր իրականացվեցին, որոնք բխում էին ՀՀ նախագահի նախընտրական ծրագրերից»,- իր կուսակցական եւ քաղաքական ղեկավարին չի մոռացել Արմեն Ղուլարյանը:
Վայոց ձորի մարզպետն էլ է տեղյակ, որ ճգնաժամ կա, ու իր ուղերձում նշել է, որ «անցնող տարին դժվարությունների տարի էր, քանզի համաշխարհային տնտեսական ճգնաժամն իր ազդեցությունն է ունեցել նաեւ մեր մարզի սոցիալ-տնտեսական իրավիճակի վրա: Այնուհանդերձ՝ 2009 թվականին Վայոց ձորի մարզում արձանագրվեցին հաջողություններ»: Վարդգես Մաթեւոսյանը մաղթել է խաղաղություն, բարեկեցություն, նվաճումներ, ձեռքբերումներ, երջանկություն, բարօրություն, խինդ, սեր:
Կոտայքի մարզպետ Կովալենկո Շահգալդյանը մաղթել է հաջողություններ, առաջընթաց, ձեռքբերումներ:
Իսկ Արմավիրի մարզպետ Աշոտ Ղահրամանյանը՝ խաղաղություն, առողջություն, երջանկություն, սեր ու համերաշխություն: 2010-ի առաջին ընդլայնված խորհրդակցության ժամանակ՝ հունվարի 11-ին, Աշոտ Ղահրամանյանը մարզպետարանի աշխատակազմին կոչ է արել աշխատանքային տարին սկսել նոր եռանդով եւ ոգեւորությամբ՝ «քանզի յուրաքանչյուրի բարեխիղճ եւ նվիրված աշխատանքով են պայմանավորված նոր տարվա ընթացքում սպասվող հաջողությունները»։
