«Առավոտի» դեկտեմբերի 18-ի համարում «Հայջրմուղկոյուղու «վեջը» չէ՞» հրապարակմամբ տեղեկացրել ենք, որ Կոտայքի մարզի՝ Երեւանին «կպած» Քասախ գյուղից ստացված ահազանգի համաձայն, դեկտեմբերի 15-ին գյուղի ջրատարներից մեկը վթարվել է, եւ երկու օր շարունակ ջուրը լցվել է գյուղի բնակիչներից մեկի տունը, սակայն «Հայջրմուղկոյուղի» ընկերությունը որեւէ ձեւով չի արձագանքել տեղի ունեցածին եւ վթարը վերացվել է սեփական ուժերով: Այս լուրը հաստատել էր նաեւ Քասախի գյուղապետ Արա Մկրտչյանը:
Ծննդյան տոների արձակուրդների ժամանակ ստացել ենք «Հայջրմուղկոյուղի» ընկերության գլխավոր տնօրեն Կ. Աղաբաբյանի նամակը: Պարոն Աղաբաբյանը տեղեկացնում է, որ Քասախի ջրամատակարարումը իրականացնում է ոչ թե «Հայջրմուղկոյուղի», այլ՝ «Երեւան ջուր» ընկերությունը:
Մենք «Հայջրմուղկոյուղու» անունն ենք նշել, քանի որ խմբագրություն ահազանգած գյուղացիներն էին պնդում, թե այս ընկերությունն է իրենց ջուր մատակարարում:
Իսկ մեղավորը՝ «Երեւան ջուր» ընկերությունը, լռում է:
