Հյուսիսային Կորեան հերթական անգամ ԱՄՆ-ին կոչ է արել խաղաղության պայմանագիր կնքել: 1950-53 թվականներին Կորեական պատերազմի ժամանակներից ի վեր այդ երկրների միջեւ ստորագրվել է միայն հաշտության համաձայնագիր, իսկ խաղաղության պայմանագիրը, Հյուսիսային Կորեայի արտգործնախարարության ընդգծմամբ, թույլ կտա արագացնել Կորեական թերակղզում միջուկային խնդրի լուծումը:
Հյուսիսային Կորեայի ԱԳՆ հայտարարության մեջ ասված է, թե անցյալ տարվանից ընդհատված վեցկողմյա բանակցությունները կարող են վերականգնվել, եթե միայն չեղյալ համարվեն ՄԱԿ-ի Անվտանգության խորհրդի կողմից կիրառվող պատժամիջոցները, որոնք սկսել են գործադրվել 2009թ. մայիսի 25-ից՝ Փխենյանի կողմից միջուկային զենքի փորձարկումներ իրականացնելու հետեւանքով:
