![\"\"](\"https://www.aravot.am/2010/aravot_arm/January/12/p14.jpg\")
Առաջիկա կիրակի օրը՝ հունվարի 17-ին Ուկրաինայում տեղի են ունենալու նախագահական ընտրություններ, որի ֆավորիտ թեկնածուները երկրի նախկին եւ ներկա վարչապետներն են՝ Վիկտոր Յանուկովիչն ու Յուլիա Տիմոշենկոն: Գործող նախագահ Վիկտոր Յուշչենկոյի հաղթանակի շանսերն այս ընտրություններում դիտորդները եթե ոչ բացառում, ապա շատ ցածր են գնահատում: «Reuters»-ը տեղեկացնում է, որ ընտրություններից 6 օր առաջ Վիկտոր Յանուկովիչը մերժել է իր հիմնական մրցակից Տիմոշենկոյի՝ ընտրությունների նախօրյակին հեռուստատեսության ուղիղ եթերով երկրի ապագայի շուրջ բանավիճելու առաջարկը: Յանուկովիչի գլխավորած «Ռեգիոնների կուսակցության» խորհրդարանական խմբակցության պատգամավոր եւ նախկին վարչապետի տեղակալ Աննա Գերմանը երկուշաբթի օրը հայտարարել է, թե՝ Յանուկովիչը պատրաստ է Տիմոշենկոյի հետ մրցակցել «բարի գործեր անելու, բայց ոչ գեղեցիկ խոսքեր ասելու համատեքստում»: «Եթե պերճախոսության աշխարհի մրցություն լիներ, ապա չիրականացվող, բայց պերճախոս խոստումներ տալու համար Տիմոշենկոն մրցակցությունից դուրս կլիներ»,- ասել է Գերմանը:
Հիշեցնենք, որ առաջիկա ընտրություններին մասնակցելու է ընդհանուր առմամբ 18 թեկնածու: Եթե առաջիկա կիրակի գրանցված այդ թեկնածուներից որեւէ մեկը ձայների կեսից ավելին չհավաքի, ապա փետրվարի 7-ին կնշանակվեն երկրորդ փուլի ընտրություններ:
