![\"\"](\"https://www.aravot.am/2009/aravot_arm/December/26/p3.jpg\")
Այս տարվա նոյեմբերի 21-ի համարում տեղեկացրել ենք, որ ՀՀ Շիրակի մարզի հազիվ 100 բնակիչ ունեցող Վարդաղբյուր գյուղի բնակիչ, ոստիկան Սարգիս Բալոյանը հողի հարկի եւ գույքահարկի 1,2 միլիոն դրամ պարտք ունի, բայց հրաժարվում է վճարել ու մարզպետ Լիդա Նանյանը, ճարահատ՝ գյուղապետին հանձնարարել է գրություն ուղարկել ՀՀ ոստիկանապետին: Տեղեկացրել ենք նաեւ, որ հողի հարկը եւ գույքահարկը չվճարող ոստիկաններ կան նաեւ Տավուշի մարզի Սեւքար գյուղում:
Սեւքարի գյուղապետ Վլադիմիր Մարգարյանից տեղեկացանք, որ մարզի ոստիկանապետի միջամտության շնորհիվ հողի հարկի պարտք ունեցող ոստիկանները սկսել են մարել պարտքերը: Պարտք ունեցող 3 ոստիկաններից մեկը այն լիովին փակել է, իսկ մյուս երկուսի հետ պարտքերի մարման ժամանակացույց է կազմվել, եւ նրանցից յուրաքանչյուրն ամսական 10-15 հազար դրամ գումար է մուծում: Գյուղապետը չասաց պարտքի ոչ անհատական, ոչ ընդհանուր չափերը:
Շիրակի մարզպետարանում, հրապարակումից մեկ օր անց ոչ ոք չգիտեր, թե ինչ ընթացք է ստացել վարդաղբյուրցի ոստիկան Սարգիս Բալոյանի պարտքերի հարցը: Իսկ Վարդաղբյուրի գյուղապետի եւ գյուղապետարանի միակ բջջային հեռախոսահամարը երկու շաբաթ շարունակ «այս պահին չի կարող զանգեր ընդունել»:
Հիշեցնենք, որ էլցանցի աշխատող սեւքարեցիները եւս 230 հազար դրամ հողի հարկ չէին վճարել եւ «Առավոտի» հրապարակումներից ու Տավուշի մարզպետի միջամտությունից հետո սկսեցին վճարել:
:
