Այսօր «Արամ Խաչատրյան» համերգասրահում Հայաստանի պետական ֆիլհարմոնիկ նվագախմբի հետ (դիրիժոր՝ Զավեն Վարդանյան) առաջին անգամ հանդես կգա երգչուհի, Տ. Սազանդարյանի եւ Գ. Գասպարյանի անվան հանրապետական մրցույթների մրցանակակիր Անուշ Հովհաննիսյանը: Նա 2008-ից կոնսերվատորիայի օպերային ստուդիայի մեներգչուհի է եւ կարճ ժամանակահատվածում հասցրել է հանդես գալ շուրջ 5 դերերգով, այդ թվում՝ Ալիսա (Դոնիցետի՝ «Լուչիա դի Լամերմուր»), Սանտուցա (Մասկանի՝ «Գեղջկական ասպետություն»), Կլարինա (Ռոսինի՝ «Ամուսնության մուրհակ»): Անուշը մասնակցել է նաեւ Շոտլանդիայի երաժշտության եւ դրամայի արքայական ակադեմիայում անցկացվող վարպետության դասերին, ելույթներ է ունեցել Ավստրիայում, Մեծ Բրիտանիայում: Քանի որ մասնագետների շրջանում շատ է խոսվում երիտասարդ արվեստագետի վոկալ հնարավորությունների եւ գեղեցիկ տեմբրի մասին, «Առավոտը» հետաքրքրվեց՝ արդյոք նրան չի՞ ձգում Ազգային օպերային թատրոնի բեմը: «Օպերային ստուդիան երիտասարդ երգիչներիս համար հիանալի դպրոց է, եւ ես դեռ սովորում եմ կոնսերվատորիայի ասպիրանտուրայում: Ամեն ինչ իր ժամանակն ունի: Իհարկե, ցանկություն ունեմ բեմ բարձրանալ օպերային թատրոնում, որի գոյության 75 տարիների ընթացքում երգել են հայ եւ արտերկրի մեծանուն վոկալիստներ»,- ասաց Ա. Հովհաննիսյանը:
