Դեկտեմբերի 15-ին Լոռու մարզի կենտրոնական գրադարանում կազմակերպված միջոցառումը նվիրված էր Հովհաննես Շիրազի ծննդյան 95 եւ մահվան 25- ամյակներին: Այն վարում էր կազմակերպիչ, գրադարանի արվեստի բաժնի վարիչ Գարիզետա Ջանազյանը: Շիրազի ստեղծագործության մասին ընդգրկուն ու համակողմանի զեկուցեց Վանաձորի պետական մանկավարժական ինստիտուտի գրականության ամբիոնի դասախոս Գայանե Մալումյանը, նրա բանաստեղծություններից ասմունքեցին նույն ամբիոնի դասախոս Մանե Պապյանը, ասմունքող Իվան Անտոնյանը, Վանաձորի թիվ 5 ավագ դպրոցի ասմունքի խմբակի սաները (ղեկավար՝ հայոց լեզվի եւ գրականության ուսուցչուհի Մարինե Գրիգորյան): Ավարտին Շիրազի «Լիրիկական» եւ «Տեսնեմ Անին ու նոր մեռնեմ» երգերը կատարեց Երեւանի թատրոնի եւ կինոյի պետական ինստիտուտի Վանաձորի մասնաճյուղի դասախոս, երգչուհի Արմինե Վիրաբյանը, նվագակցում էր Վանաձորի Միքայել Թավրիզյանի անվան արվեստի պետական քոլեջի դասախոս Կարինե Հովհաննիսյանը:
