«Հանրապետականը 2009-ին հասարակության մոտ գլուխ գովելու տեղ չունի: Ըստ էության, 2009-ը իր կենսամակարդակը չբարձրացրեց»,- երեկ մամուլի ասուլիսում ասել է ՀՀԿ փոխնախագահ Գալուստ Սահակյանը:
Ըստ պարոն Սահակյանի. «Ակտիվ քաղաքական տարում գնահատականի արժանի միակ գործընթացը հայ-թուրքականն է»:
Խոսելով Սասուն Միքայելյանի եւ նրա ազատման օգտին ստորագրած իր գործընկերների մասին՝ պարոն Սահակյանն ասել է. «Վեց-յոթ օր հետո Սասուն Միքայելյանի առողջական վիճակը լրիվ կանոնավորված կլինի այդ առումով: Նման վիրահատություններ ամեն օր կատարվում են ցանկացած հիվանդանոցում, որտեղ այդ բաժանմունքը կա: Այնպես որ՝ Սասուն Միքայելյանի խնամքը մեր հարգարժան լրագրողները թող թողնեն մեզ: Մենք շատ ուշադիր ենք եւ երբեք ու երբեք, անկախ նրանից, թե ինչպիսի դավադիր վերաբերմունք ունեցավ Սասունը, մենք ուշադիր ենք, որպեսզի օրենքի խախտում չլինի նրա նկատմամբ: Սասունին ես չեմ կարող ասել հանցագործ, բայց ոչ էլ կարող եմ ասել քաղբանտարկյալ: Ընդհանուր առմամբ՝ ես չեմ կարծում՝ այստեղ նստածներից որեւէ մեկը ավելի շատ ցավի Սասունի համար, քան ես, որովհետեւ տասնյակ տարիներ նույն կաթսայից ճաշ ենք կերել, իրար հետ քնել-վեր ենք կացել, իրար հետ գործողությունների մեջ ենք եղել: Այնպես որ՝ Սասունին մենք չենք օտարել որպես անձ, օտարել ենք որպես բնավորություն»: ՀՀ նախագահին ուղղված նամակում՝ 21 պատգամավոր, հիմնականում Հանրապետական եւ «Բարգավաճ Հայաստան» խմբակցություններից, խնդրել էին Սասուն Միքայելյանին ներում շնորհել առողջական խնդիրների պատճառով: Գալուստ Սահակյանը ի պատասխան՝ երեկ ասել է, որ նամակը ստորագրած 8 հանրապետական պատգամավորները անպայման պատասխանատվության կենթարկվեն. «Այն պատգամավորները, ովքեր ստորագրել են խմբակցությունից, մեր կողմից դատապարտվել են: Բնականաբար՝ իրավունք չունեին այդ քայլն անեին՝ մանավանդ Սասուն Միքայելյանի նկատմամբ: Այս ամբողջ գործընթացները ավելի շատ վարկաբեկեցին Սասուն Միքայելյանին որպես անձ, քան ինքը կա: Իհարկե՝ Սասուն Միքայելյանը թիմի նկատմամբ դավադիր է եղել, բայց մեր ընկերն է: Եթե Սասուն Միքայելյանը նման խնդիր ունենար, իր ձեռքով կդիմեր նախագահին կամ խմբակցությանը: Եթե պատգամավորների ստորագրություն էր անհրաժեշտ, կարծում եմ, որ առանց որեւէ բանի կարող էին դիմել «Ժառանգությանը», եւ բոլորը միանգամից կստորագրեին»։
