Ծայրահեղ տրամադրված իսրայելցի վերաբնակեցվածները երեկ առավոտյան այրել են Հորդանան գետի ձախ ափին գտնվող մի մզկիթ: Հարձակումը տեղի է ունեցել Յուսուֆ գյուղակում՝ պաղեստինյան Նաբլուս քաղաքից հարավ: Վերաբնակեցվածները, որոնք ներխուժել են մզկիթ մինչեւ արեւածագ, այրել են գորգն ու գրադարանը, որը տեղակայված էր շինության երկրորդ հարկում: Հարձակումից հետո կրակից փրկված պատերին մնացել էին ծայրահեղական գրություններ՝ «Մենք ձեզ բոլորիդ կայրենք»:
Ի պատասխան այդ հրկիզման՝ Արեւմտյան ափին սկսվեցին զանգվածային անկարգություններ, որոնց ընթացքում պաղեստինցիները սկսել են քարկոծել իսրայելյան զինվորներին: Որպեսզի ամբոխը ցրեն՝ զինվորականները հատուկ միջոցներ են կիրառել, բայց ցուցարարների վրա կրակ չեն բացել: Անկարգությունների արդյունքում տուժել են մի իսրայելցի զինվոր եւ երկու տեղաբնակ:
Մզկիթի վրա հարձակումն արդեն իսկ դատապարտել են երկու կողմերի ղեկավարներն էլ: Իսրայելի պաշտպանության նախարար Եհուդ Բարաքը հայտարարել է, որ նման երեւույթները մեկ օրում կործանում են այն ամենը, ինչը տարիներով մշակվում է երկարատեւ բանակցային գործընթացներում: Իսկ պաղեստինյան ինքնավարության ղեկավար Մահմուդ Աբասը տեղի ունեցածն իր կողմից անվանել է «ստոր եւ անարժան հանցագործություն» եւ կոչ է արել Իսրայելին՝ «սանձել վայրենիներին»:
Վերաբնակեցվածների ագրեսիան կապված է Հորդանան գետի ձախ ափին իսրայելական բնակավայրերի կառուցմանը դադար տալու հետ: Դա միջազգային հանրության ներկայացուցիչների, այդ թվում՝ Ռուսաստանի եւ ԱՄՆ-ի պահանջն էր: Դիտորդների կարծիքով՝ Իսրայելի ակտիվությունը Ձախափին չի նպաստում հակամարտության խաղաղ կարգավորմանը:
