Երեկ «Արամ Խաչատրյան» ֆիլհարմոնիկ դահլիճում տեղի ունեցավ Հայաստանում ֆրանսիական համալսարանի 2008-2009 ուստարվա շրջանավարտներին ֆրանսիական Licence/Master եւ հայկական Բակալավրի/Մագիստրոսի պետական դիպլոմների շնորհման հանդիսավոր արարողությունը: Միջոցառմանը ներկա էին Հայաստանում Ֆրանսիայի արտակարգ եւ լիազոր դեսպան պարոն Սերժ Սմեսոֆֆը, պաշտոնատար այլ անձինք, ՀՀ-ում հավատարմագրված այլ դեսպաններ, Լիոն-3 համալսարանից հրավիրված հյուրեր եւ ձեռնարկությունների ղեկավարներ: Դիպլոմներ ստացան 170 շրջանավարտներ: Քանի որ ներկայումս շատ է խոսվում համալսարանի՝ ֆրանսիական նմուշի դիպլոմ տալու հանգամանքի մասին, «Առավոտը» Հայաստանում ֆրանսիական համալսարանի հասարակայնության հետ կապերի բաժնի վարիչ Արմեն Բաղդասարյանից հետաքրքրվեց, թե այդ դիպլոմը շրջանավարտներին ի՞նչ առավելություններ է տալիս: Նա ասաց. «Դա շրջանավարտներին հնարավորություն է տալիս ցանկության դեպքում կրթությունը շարունակել արտասահմանում եւ ավելի մեծ ու շահավետ հնարավորություններ ստեղծում աշխատանքի տեղավորման համար»:
