Երեկ Կենտրոն եւ Նորք-Մարաշ համայնքների ընդհանուր իրավասության դատարանի դատավոր Մնացական Մարտիրոսյանի նախագահությամբ շարունակվեց «Հայկական ժամանակ» օրաթերթի գլխավոր խմբագիր Նիկոլ Փաշինյանի դեմ հարուցված քրեական գործի դատաքննությունը: Ապացույցների հետազոտման փուլը դեռ չի ավարտվել եւ պաշտպանական կողմը դատարանին ներկայացրեց Դավիթ Շահնազարյանի, Աշոտ Բլեյանի, Սյուզան Պողոսյանի, Դավիթ Մաթեւոսյանի, Անդրանիկ Քոչարյանի բացատրությունները: Դրանք վկայում էին այն մասին, որ զանգվածային անկարգությունների կազմակերպման մեջ մեղադրվող Ն. Փաշինյանը կապ չունի մարտի 1-2-ը տեղի ունեցածի հետ, ընդհակառակը՝ փաստում էին, որ լրագրողը կոչ է արել չբախվել ուժային կառույցների հետ, զերծ մնալ սադրանքներից:
Երեկ դատարանում հրապարակվեց նաեւ փաստահավաք խմբի զեկույցը:
