Ֆինանսական հաշտարարի գրասենյակ դիմած քաղաքացիներին խորհուրդ են տալիս հաշտվել խնդիրների հետ՝ փոխանակ դրանք լուծեն:
Ֆինանսական հաշտարարի գրասենյակը բացելուն պես՝ բանկերից, ապահովագրական ընկերություններից «վառված» հայ սպառողները հույս ունեցան, որ իրենց հարցերը կարող են հեշտ ու հանգիստ՝ հաշտարարի միջոցով լուծել: Սակայն, պարզվում է, որ այս գրասենյակն այնքան էլ սրտացավորեն չի մոտենում շարքային սպառողների խնդիրներին:
«Առավոտին» դիմած մի քանի բնակիչներ, որոնք ապահովագրական ընկերությունների հետ խնդիրներ են ունեցել, ինչի պատճառով էլ դիմել են հաշտարարի գրասենյակ, վստահեցրին, որ իրենց, այսպես ասած՝ գլխառադ են արել: Այն, որ Ֆինանսական հաշտարարի գրասենյակը իր հաճախորդներից շատերի հետ գլուխ չի դնում, վստահեցնում են նաեւ հենց որոշ ապահովագրական ընկերություններից: Վերջերս դրանցից մեկում սեփական ավտոմեքենան ապահովագրելուց հետո, մի քաղաքացի վթարի է ենթարկվել, ինչի հետեւանքով մեքենան ջարդուփշուր է եղել: Այդ քաղաքացին ընկերությունից փորձել է ստանալ ապահովագրական գումարը, սակայն մերժվել է, այն պատճառաբանությամբ, որ ժամանակին չի տեղեկացրել ընկերությանը, բացի այդ, մեքենան խփվել է ոչ թե երթեւեկության ժամանակ, այլ կայանելու պահին՝ պատին: Այս ամենից հետո սպառողը հույսը դրել է Ֆինանսական հաշտարարի գրասենյակի վրա, սակայն այստեղ էլ նրան բանի տեղ չեն դրել եւ հենց հեռախոսով ասել են՝ «Ձեզ ոչնչով չենք կարող օգնել, խորհուրդ կտանք հաշտվեք ապահովագրական ընկերության հետ»: «Սպառողներին գլխառադ են անում ու չեն խորանում նրանց խնդիրների մեջ, ինչ է թե՝ անվճար սպասարկում են անում: Եթե վճարովի լիներ, օրինակ՝ մեզանից մեծ գումարներ ստանան, պարզ է, որ կխառնվեն իրար, փաստաթղթերը կփորփրեն, դեռ մի բան էլ՝ ապահովագրական ընկերություններին, գրավատներին ու բանկերին պատասխանատվության կենթարկեն»:
Այս խնդիրների առնչությամբ «Առավոտը» զրուցեց Ֆինանսական հաշտարարի գրասենյակի կառավարիչ Փիրուզա Սարգսյանի հետ: Նրա խոսքերով. «Նման իրավիճակ չեմ հիշում: Ուղղակի մեր գրասենյակը 2 մասից է բաղկացած: Մասնագետների առաջին խումբը զբաղվում է զանգերով, այսինքն՝ հեռախոսով պատասխանում են ու սպառողներին բացատրում իրենց իրավունքներն ու շահերը: Եթե առաջին հայացքից մասնագետը գտնում է, որ սպառողը սխալ է, ասում է՝ հնարավոր է դուք շանս չունեք գումարը ստանալու, բայց եկեք գրասենյակ՝ կզրուցենք»: Ըստ Փ. Սարգսյանի, անկախ այն հանգամանքից, բողոքը իրենց քննելու առարկա՞ն է, թե՝ ոչ, իրավունք չունեն քաղաքացու պահանջը չվերցնել. «Ես կարծում եմ, պարզապես տվյալ քաղաքացին հետամուտ չի եղել: Ամեն դեպքում, այդ մարդը թող գա մեր գրասենյակ, կզրուցենք եւ կպարզենք, թե ինչ խնդիր կա»:
Ֆինանսական հաշտարարի խոսքերով՝ երբ նախորդ տարվանից սկսեց գործել գրասենյակը, մարդիկ ինչ ֆինանսական խնդիրներ ունենում էին, դիմում էին իրենց. «Սկզբում ԽՍՀՄ խնայբանկի ավանդների փոխհատուցման խնդիրներով էին դիմում, այսինքն՝ պահանջում էին փոխհատուցման ցուցակներում իրենց ներառել, դա մեր գործառույթը չէ: Բայց, որպեսզի փչացած հեռախոսի էֆեկտը չլինի՝ գնա այստեղ, գնա այնտեղ, այդ մարդկանց ուղղորդում ենք համապատասխան գերատեսչություններ կամ էլ հեռախոսահամարներ ենք տալիս: Ալիմենտի գործերով էին մեզ շատ դիմում: Մարդկանց թվում է, եթե ֆինանսական խնդիր է, ապա հաշտարարը կարող է լուծել: Ասենք, աշխատանքից ազատվել է, վերջնահաշիվն ուշացնում են, կամ հարեւանը բարեկամին գումար է տվել ու ետ չի կարողանում ստանալ, այս խնդիրներով կրկին մեզ են դիմում: Նման խնդիրները մեր քննարկման առարկա չեն: Կամ էլ տասնյակ տարիներ առաջ լուծարված բանկ է, պարտատերերը ի հայտ են գալիս ու ասում՝ կարո՞ղ եք օգնել: Մենք բացատրում ենք, որ 2008-ի օգոստոսի 2-ից հետո եղած խնդիրներն են ենթակա մեր քննարկմանը»: Նշենք, որ Ֆինանսական հաշտարարի գրասենյակի գործառույթն է ֆինանսական շուկայում ծագած գույքային խնդիրների քննումը, այսինքն՝ սպառողը կոնկրետ գումարի պահանջ պետք է ունենա: Ընդ որում, գույքային պահանջը չպետք է գերազանցի 10 միլիոն դրամը: Սակայն մինչ գրասենյակին դիմելը, սպառողը նախ բողոք-պահանջը պետք է տվյալ ֆինանսական կառույցին ներկայացնի, եթե պատասխանը չի բավարարում կամ 10-օրյա ժամկետում չեն պատասխանում, ապա վերջինս կարող է դիմել հաշտարարին:
Օրինակ, հաշտարարի միջոցով սպառողներից մեկը կարողացել է բանկերից մեկի անպատասխանատու գործողությունների պատճառով կրած վնասները վերականգնել: Փ. Սարգսյանի պատմելով՝ «Քաղաքացիներից մեկը դիմել է բանկին՝ հաշիվ բացելու եւ սպասարկվելու համար. պայմանագիրը կնքվել է, ստացել պլաստիկ քարտ, որով նա բանկոմատներից կարող է գումար հանել: Այդ բանկը գործընկերների ցուցակ է ունեցել, որոնց բանկոմատներից գումար հանելու դեպքում տվյալ հաճախորդը միջնորդավճար չի կատարելու: Սակայն բանկը գործընկերների ցուցակը փոխել է, բայց հաճախորդին չի տեղեկացրել: Այդ հաճախորդը մշտապես միեւնույն բանկոմատից է օգտվել, սակայն այն արդեն իր բանկին գործընկեր չէ եւ միջնորդավճար է վերցրել: Մի քանի ամսում 54 հազար դրամ միջնորդավճար է մուծել, ինչի մասին տեղեկացել է հաշվեքաղվածքից: Տվյալ անձը դիմել էր մեզ, այս դեպքում ինքը իրավունք ուներ պահանջել իր 54 հազարը, քանի որ բանկը պարտավոր էր նրան տեղեկացնել գործընկերների փոփոխության մասին: Առանց որեւէ բարդությունների՝ այդ անձի գումարն ամբողջությամբ վերադարձվել է»:
Հաշտարարի խոսքերով՝ բանկերի դեմ սպառողները հաճախ բողոքում են, թե բանկը իրենց ավանդների տոկոսները սխալ է հաշվել. «Հատկապես, եթե ավանդը եղել է դոլարով, բայց տոկոսների վճարումը կատարվում է դրամով, փոխարժեքի հաշվարկման տարբերությունների արդյունքում մարդիկ տեսնում են, որ տուժում են: Պատահում է, որ սպառողների մոտ թյուրիմացություն է լինում, քանի որ պայմանագրում ամեն ինչ հստակ նշված է, սակայն մեր քաղաքացիները չեն սիրում պայմանագրերը կարդալ. իրենց այդ պահին գումար է պետք, գնում են բանկ, արագ ձեւակերպում ու վարկը ստանում: Երբ մի քանի ամիս հետո տեսնում են, որ տոկոսները բարձր են ստացվում, նոր բողոքում են, այնինչ՝ պայմանագրում այդ մասին գրված է եղել»:
