ԱԺ ընդդիմություն-իշխանություն բանավեճը՝ մարտի 1-ի առնչությամբ առաջարկների մշտադիտարկում իրականացնելու շուրջ:
Խորհրդարանը երեկ սկսեց քննարկել Դավիթ Հարությունյանի նախաձեռնությունը, ըստ որի՝ ԱԺ որոշմամբ պետք է հանձնարարություն տրվի պետաիրավական հարցերի մշտական հանձնաժողովին մշտադիտարկում (մոնիտորինգ) իրականացնել «Մարտի 1»-ի ժամանակավոր հանձնաժողովի եզրակացությունում ընդգրկված առաջարկությունների կատարման ընթացքի մասին: Ըստ որոշման նախագծի՝ մշտադիտարկման արդյունքների մասին «մինչեւ 4-րդ գումարման ԱԺ լիազորությունների ավարտը` յուրաքանչյուր հերթական նստաշրջանում մեկ անգամ» հանձնաժողովը պիտի ներկայացնի եզրակացություն: Նաեւ նախատեսված է, որ եթե ԱԺ պետաիրավական հարցերի հանձնաժողովի անդամների առնվազն 1/3-ը դեմ է մշտադիտարկման իրականացման առնչությամբ եզրակացությանը՝ «Եվ դրա վերաբերյալ ունի հատուկ կարծիք, ապա նրանց ներկայացուցիչը կարող է ԱԺ-ում հանձնաժողովի եզրակացության քննարկման ընթացքում հանդես գալ հարակից զեկուցմամբ` ներկայացնելով եզրակացության վերաբերյալ իրենց հատուկ կարծիքը»:
Դավիթ Հարությունյանը սա իր ելույթում ներկայացրեց իբրեւ ընդդիմության իրավունքների պաշտպանություն:
«Ժառանգություն» խմբակցության ղեկավար Ստյոպա Սաֆարյանն այս կապակցությամբ նրան բավական հեգնական հարց ուղղեց. «Ուզում եմ ընդդիմությանը հետ պահել Ձեր ողորմածությունից: ԱԺ կանոնակարգում փոփոխություններ արվեցին՝ առանց ընդդիմության կարծիքը հաշվի առնելու: Եվ հիմա տպավորություն ստեղծել, թե ընդդիմությանն էլ ենք բան տալիս… Կարելի է, որ այդ նախադասությունն ընդհանրապես հանե՛ք, քանի որ ընդհանրապես անընդունելի է այն նախագիծը, որ ներկայացրել եք: Անընդունելի է, քանի որ հիշում ենք Ձեր ելույթները ԵԽԽՎ-ում մարտի 1-2-ի դեպքերի առնչությամբ: Անընդունելի է, քանի որ չենք հավատում, որ իսկապես ցանկություն ունեք վերացնել մարտի 1-ի հետեւանքները: Անընդունելի է, քանի որ ժամանակին, երբ «Ժառանգությունն» առաջարկում էր աուդիտի եւ մոնիտորինգի հանձնաժողով ձեւավորել ու դա վերապահել ընդդիմությանը՝ այն պատճառով, որ իշխանությունը չի կարող ինքն իրեն վերահսկել, դա մերժվեց: Ինչո՞ւ այն ժամանակ, երբ «Ժառանգությունը» եւ ՀՅԴ-ն ներկայացրին ԱԺ որոշման նախագծեր «Մարտի 1»-ի ժամանակավոր հանձնաժողովի զեկույցի հետ կապված՝ հանկարծ հրապարակում հայտնվեց Ձեր նախաձեռնությունը: Ինչո՞ւ եք անհանգստացած, որ կարող է մեր կամ ՀՅԴ առաջարկած որոշման նախագիծը դրվեր քննարկման եւ միգուցե ընդունվեր: Ի՞նչ կարիք կա ամեն անգամ կոնտր-քայլեր անել այն նախաձեռնություններին, որոնք ընդդիմությանն են պատկանում, եւ որոնք կարող էին ուղղակի լավ հիմք դառնալ ընդհանուր լուծումներ գտնելու առումով, եւ ոչ թե միանձնյա որոշեք, թե ինչ եք առաջարկում ընդդիմությանը»: Դավիթ Հարությունյանի պատասխանը ոչ պակաս «չոր» էր. «Գիտե՞ք, ես ունեմ բացարձակապես նույնքան իրավունք օրենսդրական նախաձեռնություն ցուցաբերելու, ինչքան եւ Դուք: Ես օգտվում եմ իմ իրավունքից: Իսկ կարիքն ինքս եմ գնահատում՝ քաղաքական նպատակահարմարությունից ելնելով»:
ՀՅԴ խմբակցության պատգամավոր Արծվիկ Մինասյանը հետաքրքրվեց, թե արդյոք չի՞ կարծում, որ որոշման նախագիծն այս տեսքով ընդունելու դեպքում կձեւավորվի մի վատ նախադեպ, որով կշրջանցվի Սահմանադրությամբ նախատեսված՝ ժամանակավոր հանձնաժողով ստեղծելու գաղափարը: ԱԺ պետաիրավական հարցերի հանձնաժողովի նախագահի պատասխանն էր. «Այս ձեւով մենք ամենեւին չենք հավակնում արժեզրկել ժամանակավոր հանձնաժողովի ինստիտուտը: Սակայն կարծում եմ, որ մշտական հանձնաժողովները եւս պետք է մասնակցեն ԱԺ վերահսկողական իրավասությունների իրականացմանը: Ավելի՛ն՝ նրանք այդ պարտավորությունը պետք է ունենան ի սկզբանե»:
Քննարկումը կշարունակվի այսօր:
