![\"\"](\"https://www.aravot.am/2009/aravot_arm/December/9/p14.jpg\")
Վրաստանում կրթության նոր նախարար է նշանակվել Դմիտրի Շաշկինը (նկարում), որը մինչ այդ զբաղեցնում էր պատիժների իրականացման, պրոբացիայի (անգլերեն probation, ինչը ԱՄՆ-ի, Անգլիայի եւ մի շարք այլ երկրների քրեական օրենսդրության մեջ նախատեսված պայմանական դատապարտման տեսակ է) եւ իրավաբանական օգնության նախարարի պաշտոնը:
Վրաստանի վարչապետ Նիկա Գիլաուրին լրագրողներին ասել է, որ կրթության նախկին նախարար Նիկա Գվամարիան մեկնել է արտերկիր՝ կրթությունը շարունակելու: Գվամարիան Վրաստանի կրթության նախարարի պաշտոնը զբաղեցրել է ուղիղ մեկ տարի. նա այդ պաշտոնին էր անցել 2008-ի դեկտեմբերի 5-ից:
Իսկ Դմիտրի Շաշկինը պրոբացիայի, պատիժների իրականացման եւ իրավաբանական օժանդակության նախարարությունը ղեկավարում էր դրա ստեղծման իսկ օրվանից՝ 2009-ի փետրվարից: Այդ աշխատանքի հետ միաժամանակ Շաշկինը ներկայացնում էր Վրաստանը Միջազգային հանրապետական ինստիտուտում (IRI):
