Բացօթյա առեւտուրը շուկաներում կենտրոնացնելու նպատակով, քաղաքապետարանի աշխատակիցների կողմից կատարվում են ուսումնասիրություններ, ճշգրտվում է առեւտրի կարգավորման ընդհանուր մոտեցումը, հնարավոր է ներառվի եվրոպական փորձը՝ բացօթյա առեւտրի համար թույլատրելի օրեր սահմանելով շաբաթը եւ կիրակին: Այս մասին, որպես շաբաթվա հանձնարարականների կատարողական, զեկուցվել է Երեւանի քաղաքապետարանի ամենշաբաթյա խորհրդակցության ընթացքում: Ըստ քաղաքապետարանի տեղեկատվության եւ հասարակայնության հետ կապերի վարչության, խորհրդակցությունը վարել է քաղաքապետ Գագիկ Բեգլարյանը: Զեկուցվել է նաեւ ձմռան նախապատրաստության ընթացքի մասին եւ նշվել, որ տեղումների օրերին սահմանվելու է շուրջօրյա հերթապահություն:
Քաղաքապետ Գագիկ Բեգլարյանը հանձնարարել է քաղաքացիների դիմումներին պատասխանել ժամանակին՝ անպատասխան չթողնելով որեւէ քաղաքացու: Գագիկ Բեգլարյանը նշել է նաեւ, որ Նոր տարվա առթիվ քաղաքապետարանը նվերներով կշնորհավորի մանկապարտեզների եւ դպրոցների 1-4-րդ դասարանցի 50 000-ից ավելի երեխաների, ազատամարտիկների ընտանիքների, հաշմանդամ մարդկանց եւ միայնակ թոշակառուների որոշակի խմբերի: Իսկ տոնական կեսգիշերին Երեւանի բոլոր վարչական շրջաններում կկազմակերպվի հրավառություն:
