Դեկտեմբերի 6-ին Մալաթիա-Սեբաստիայի թիվ 8 եւ Հրազդանի թիվ 25 ընտրատարածքներում տեղի են ունեցել ԱԺ մեծամասնական ընտրակարգով ընտրություններ՝ պատգամավորներ Հակոբ Հակոբյանի եւ Սասուն Միքայելյանի՝ պատգամավորական լիազորությունները դադարեցնելու արդյունքում: Երկու ընտրատարածքներում էլ ընտրություններին մասնակցում էին մեկական իշխանական թեկնածուներ: Նախնական տվյալներով՝ ՀՀԿ-ական Կորյուն Նահապետյանը ստացել է 8 382, իսկ «Բարգավաճ Հայաստանը» ներկայացնող Մխիթար Հարությունյանը ստացել է 13 439 ձայն: Վերջնական արդյունքները պարզ կլինեն մինչեւ դեկտեմբերի 11-ը: Թիվ 8 ընտրատարածքում ընտրություններին պետք է մասնակցեին 60,593 ընտրող, մինչդեռ գրանցված եւ քվեաթերթիկ ստացած մասնակիցների թիվը, ըստ ստորագրությունների` 8 706-ն էր (14,12 տոկոս), իսկ թիվ 25 ընտրատարածքում՝ 57,074 ընտրող, մինչդեռ մասնակցել է 14 146-ը (24,79 տոկոս): Մասնակցության նման աննախադեպ պասիվությունը ԿԸՀ ներկայացուցիչներն «Առավոտի» հետ զրույցում պարզաբանեցին մեկական թեկնածուի պարագայով:
