Կարապետիչը չի վստահում ՀՅԴ-ի անկեղծությանը

Իսկ միավորված կոմունիստները հիշել են ինտերնացիոնալիզմի եւ ազգայնականության անհամատեղելիության մասին:

Միավորված կոմունիստական կուսակցության ղեկավար Յուրա Մանուկյանը մի առիթով մեր թերթին տված հարցազրույցում դրական բնութագրելով Դաշնակցության ներկայիս գործունեությունը, անգամ ասել էր, որ կցանկանար նույնիսկ ՀՅԴ խմբակցությանն անդամակցել: Երեկ փորձեցինք ճշտել, թե ինչո՞ւ են ընկեր Մանուկյանն ու նորացված-միավորված կոմունիստները ձեռնպահ մնում Դաշնակցության հետ ներկայիս համագործակցությունից: «Այլ բան է սոցիալական խնդիրներում սոցիալիստական դիրքորոշմամբ կուսակցության գործողություններին հավանություն տալը, այլ բան է արտաքին քաղաքական եւ ժամանակակից մարտահրավերների դիմակայության խնդրում քաղաքական կուսակցությունների դիրքորոշումների տարբերությունը: Ես երբեք չեմ կարծել ու չեմ կարծում, որ հաջորդ սերնդին ծանր բեռ պետք է թողնել: Սա շատ ծանր բեռ է, որ մենք մեզ վրա ենք վերցրել՝ հանրապետության նախագահի համարձակ կամքի դրսեւորման ճանապարհով: Պետք է տակից դուրս գանք: Խուսափելով կամ վախն աչքներիս առաջ ապրելով՝ հաջորդ սերնդին օգտակար լինել չենք կարող: Փորձը փորձանք չէ: Չի՞ ստացվի, հաջորդ սերունդը կիմանա, որ դա մեկ անգամ փորձված է, անհաջող քայլ է ու ինքը չի փորձի: Այսօր քաղաքակիրթ աշխարհը զբաղվում է մեր խնդիրներով: Մենք իրավունք չունենք դա մի կողմ թողնել եւ ասել՝ թուրքի հետ անելիք չունենք: Համարձակ պետք է գնանք առաջ»,- ասում է Յուրա Մանուկյանը: Անդրադառնալով ՀՅԴ-ի դիրքորոշումներին, ընկեր Մանուկյանը օրինաչափ է համարում, որ ազգայնական ՀՅԴ-ի եւ ինտերնացիոնալ ՀՄԿԿ-ի դիրքորոշումները չեն համընկնում: Կվավերացնի՞ Թուրքիայի խորհրդարանը արձանագրությունները, թե՝ ոչ, մեր զրուցակիցը դժվարանում է կանխատեսել. «Կարող է ձգձգումներ լինեն, բայց չեմ կարծում, որ ամբողջ երկրի առաջ Թուրքիայի ղեկավարությունն իր ժողովրդին ու պետությանն անհարմար վիճակի մեջ կդնի»:
Իսկ «Ժողովրդական կուսակցության» նախագահ Տիգրան Կարապետյանն ու իր ղեկավարած կուսակցությունը «Ոչ՝ արձանագրություններին» փաստաթղթի տակ ստորագրելով, սահմանափակել է համագործակցությունը ՀՅԴ-ի նախաձեռնության շրջանակներում: Երեկ «Առավոտը» փորձեց ստանալ պարոն Կարապետյանի մեկնաբանությունները՝ թե ինչպե՞ս է վերաբերվում Դաշնակցության՝ իշխանափոխության պահանջի սպառնալիքներին: Մեր զրուցակիցը նախ ասաց. «Ես չեմ ցանկանում համագործակցել կուսակցությունների հետ՝ հասկանալով, թե ինչ են ուզում: Իշխանությունը ձգտում է դաշինքավորել, մեջտեղից հանել ու զրոյացնել կուսակցություններին: Այն, ինչ անում է չորս տարի: Մենք մեր դիրքն ու տեղն ունենք»: Իսկ ՀՅԴ-ի՝ իշխանափոխության հնարավոր պահանջներին  Կարապետիչն այսպես է վերաբերվում. «Հա, ասում են՝ եթե, կարող է,… կոնկրետ բան ես չեմ տեսնում: Իմ դիրքորոշումները ես ունեմ, եւ դրանք հստակ են ու կապված չեն մի գործընթացի հետ, այլ իշխանության աշխատաոճի հետ»: Կարապետիչը համոզված է, որ իշխանությունների գործողություններն ուղղորդվում են դրսի ուժերի կողմից: Նա ՀՅԴ-ին համարում է ազգային ուժ, բայց՝ «այն ֆորմատով, որ սկսել են, կարծում եմ, նպատակ ունեն հետագայում միավորումը մտցնել մի կուսակցության մեջ: Օրինակ՝ ԲՀԿ-ի: Ապագան այնպես է երեւում, որ երկու կուսակցություն-դաշինք է լինելու՝ ԲՀԿ եւ ՀՀԿ: Բայց ես իմ ոճը չեմ փոխի, որովհետեւ այս խաղերն ու արհեստական միացումները ինձ չեն հետաքրքրում»: