Նախադպրոցական հաստատությունների հիմնախնդիրները սրվում են հատկապես ձմռան ամիսներին
![\"\"](\"https://www.aravot.am/2009/aravot_arm/December/5/p28.jpg\")
Ամեն տարի դեռ աշնան վերջին օրերից այն ծնողները, ովքեր իրենց երեխաներին տանում են, համայնքային ենթակայության տակ գտնվող մանկապարտեզներ, սկսում են մտորել՝ ձմռան ամիսներին երեխաներին մանկապարտեզ տանել-չտանելու մասին:
«Առավոտի» հետ զրուցած շատ ծնողներ, որոնց երեխաների հաճախած մանկապարտեզները չեն ջեռուցվում, հայտնեցին հետեւյալը. «Իհարկե, տնօրեններն ասում են, որ խմբասենյակներում ապահովում են բավարար ջերմաստիճան՝ +18, +19: Բայց մենք վստահ չենք, որ իրականում ջերմաստիճանն այդքանի հասնում է: Այդ ինչպե՞ս է, որ մեր բնակարաններում, որտեղ ամբողջ օրը վառվում են էլեկտրական սալիկներ, ջերմաստիճանը չի անցնում +16-ից, իսկ այդ մեծ խմբասենյակում կարող է հասնել +18-ի: Անշուշտ, մենք շահագրգռված ենք երեխաներին մանկապարտեզ տանել, քանի որ նախ՝ չենք ցանկանում, որպեսզի խախտվի երեխայի կրթության շարունակականությունը, եւ հետո՝ աշխատում ենք, իսկ երեխաներին տանը հետեւող չկա»: Իհարկե, տարեցտարի իրավիճակը փոխվում է. պետական հատկացումներով, հովանավորների կամ այլ միջոցներով մանկապարտեզի տնօրենները հաջողացնում են ջեռուցել նախադպրոցական հաստատությունները: Բայց իրավիճակը դեռ հեռու է կատարյալին մոտ լինելուց: Սա փաստեց նաեւ «Առավոտի» կատարած հարցումը Երեւանի մի շարք մանկապարտեզների տնօրենների շրջանում:
Մեր առաջին զրուցակիցը Մալաթիա-Սեբաստիա համայնքի թիվ 11 մանկապարտեզի տնօրեն Նուրիցա Շահբազյանն էր: Նա նշեց. «Մեր մանկապարտեզը կաթսայատուն չունի, խմբասենյակն ու երկու ննջասենյակները տաքացնում ենք էլեկտրական մարտկոցներով, սալիկներով: Իսկ ջեռուցման հարցերը խոստացել են լուծել մինչեւ 2011 թվականը: Բայց այսօր էլ երեխաները հաճախում են եւ եթե որոշ երեխաներ բացակայում էլ են, ապա դա արվում է նրանց ծնողների դիմումի համաձայն»: Շենգավիթ համայնքի թիվ 230 մանկապարտեզի տնօրեն Սոնա Խաչատրյանը եւս փաստեց, որ իրենք չունեն կաթսայատուն, եւ նշեց, թե ինչպես են կազմակերպում աշխատանքները ձմռան ամիսներին. «Ջեռուցումը կատարվում է էլեկտրականության միջոցով: Իհարկե, այնքան էլ հարմար չէ, բայց ստիպված ենք խմբերը կոմպլեկտավորել, որպեսզի կարողանանք աշխատել»:
Էրեբունի համայնքի թիվ 4 մանկապարտեզը եւս չունի կաթսայատուն. այստեղ եւս ձմռան ցրտից պաշտպանվում են էլեկտրական սալիկներով: Տնօրեն Ռիմա Ստեփանյանն ասաց. «Մենք ապահովում ենք +18+19 աստիճան ջերմաստիճան: Այլ կերպ չենք էլ կարող աշխատել, քանի որ անընդհատ տեսչությունից, վարչությունից ստուգումներ են իրականացվում: Գիշեր-ցերեկ վառում ենք, որպեսզի տաք լինի, եւ կարողանանք նաեւ պարապմունքներ իրականացնել»:
Երեւանի քաղաքապետարանի ենթակայության տակ է գտնվում թվով 162 նախադպրոցական ուսումնական հաստատություն: Ըստ քաղաքապետարանի նորանշանակ կրթության վարչության պետ Գայանե Սողոմոնյանի՝ դրանցից ընդամենը 56-ը ունի կաթսայատուն: Իսկ 102 չջեռուցվող մանկապարտեզներ այս տարի եւս կտաքանան էլեկտրական, փչովի յուղային տաքացուցիչներով ու կաշխատեն խտացված խմբերով:
«Առավոտի» բարձրացրած մտահոգությանը վարչության պետն այսպես արձագանքեց. «Նախադպրոցական ուսումնական հաստատությունների հիմնախնդիրները գտնվում են քաղաքապետի ուշադրության կենտրոնում: Մենք արդեն մշակել ենք քառամյա ծրագիր, որի շրջանակներում 2010-2013թթ. 102 մանկապարտեզներ աստիճանաբար կջեռուցվեն: 2010-ի համար արդեն կազմված է 24 նախադպրոցական հաստատության կաթսայատան կառուցման պլան: Մանկապարտեզների առումով քաղաքապետարանը ծանր ժառանգություն ստացավ, ու բոլորս էլ գիտենք, որ մանկապարտեզներում տիրող իրավիճակը պարզապես ուրախալի չէ»: «Առավոտը» հետաքրքրվեց, թե կա՞ն հստակ սահմանված առաջնահերթություններ, որոնց համապատասխան էլ կորոշվի, թե շուտափույթ ո՞ր մանկապարտեզների ջեռուցման հարցերը լուծել, որ հանկարծ այս պարագայում էլ չգործեն խնամի-ծանոթ-բարեկամ, կամ «վերեւներում» ունեցած կապերը: Գ. Սողոմոնյանը պատասխանեց. «Առաջնահերթություն ենք տալու այն մանկապարտեզներին, որոնք ունեն 180-300 սաներ, այնուհետեւ կլուծվեն ավելի նվազ թվով սաներ ունեցող մանկապարտեզների ջեռուցման հարցերը: Հաշվի ենք առնելու նաեւ աշխարհագրական դիրքը. օրինակ՝ Նորք- Մարաշ, Նոր Նորք, Ավան վարչական շրջաններում ջերմաստիճանի 4-5 աստիճանի տարբերություն կա, նաեւ առաջնահերթությունը տալու ենք, այսպես կոչված, ծեր, գիշերօթիկ, մսուրային խմբեր ունեցող մանկապարտեզներին»: Ծնողների անվստահության հետ կապված՝ վարչության պետն ասաց. «Վստահել-չվստահելն իրենց խնդիրն է, պարզապես նրանք կարող են գնալ մանկապարտեզ եւ տեղում ճշտել ջերմաստիճանը: Իսկ մեր վարչության աշխատակիցների կատարած այցերը մանկապարտեզներ եւ ծնողների հետ հանդիպումները ցույց տվեցին, որ ձմռանը, հատկապես հունվարին, երեխաներին մանկապարտեզ չբերելը մի տեսակ ավանդույթ է դարձել: Այդ դեպքում հարցնում եմ՝ ինչո՞ւ են դեկտեմբերին բերում մանկապարտեզ: Մեծամասնությունը պատասխանում է, որ չի ուզում երեխային զրկել տոնական հանդեսներից, նվերներից եւ տրամադրությունից: Հունվար ամսին մանկապարտեզ չբերելու պատճառը նաեւ այն է, որ հունվարի մի քանի օրեր այսպես թե այնպես արձակուրդային են, եւ ծնողները չեն ցանկանում մնացած օրերի համար վճարել»: Գ. Սողոմոնյանը նշեց նաեւ, որ մանկապարտեզների պարագայում իրենք ծնողներին ստիպելու մեխանիզմներ չունեն, ինչպես դպրոցներում: Այստեղ երեխային բերել-չբերելը ծնողի ցանկությամբ է: Բայց արդեն մշակված նոր կարգը, ըստ վարչության պետի, շատ հարցեր կլուծի: Դա հետեւյալն է. «Արդեն մշակել ենք մի նոր մոդել, որի համաձայն՝ 2010-ից մանկապարտեզները կֆինանսավորվեն սան-թվով, ինչպես դպրոցները: Դրա արդյունքում մենք մանկապարտեզների տնօրեններից կպահանջենք փաստական հաճախումների մասին տեղեկատվություն եւ կհետեւենք, թե արդյոք ֆինանսավորումը նպատակայի՞ն է ծախսվել»: «Առավոտի» այն հարցին, թե արդյոք այս նոր որոշումը տնօրենների մոտ դժգոհություն չառաջացրե՞ց, Գ. Սողոմոնյանը պատասխանեց. «Մանկապարտեզների տնօրենները սովորել էին բոլոր ծախսերն իրենք տնօրինել, բայց ժամանակն է համակարգված աշխատելու»:
