Եթե Բաքուն իրականացնի Ղարաբաղում նոր պատերազմ սանձազերծելու իր սպառնալիքը, Ռուսաստանը ստիպված կլինի հրաժարվել ներկայիս հավասարակշռված քաղաքականությունից եւ, ամենայն հավանականությամբ, ներգրավված կլինի ռազմական հակամարտության մեջ՝ Հայաստանի կողմից: «ԱրմԻնֆո»-ի թղթակցի հետ զրույցում այդպիսի կարծիք է հայտնել STRATFOR ռազմավարական հետազոտությունների ամերիկյան գլոբալ կենտրոնի Եվրասիայի հարցերով փորձագետ Մարկո Պապիկը: «Դա տեղի կունենա, քանի որ Ռուսաստանն ընկալվում է որպես Հայաստանի ռազմական դաշնակից՝ չնայած ՌԴ-ն տվյալ պահին հնարավոր բոլոր միջոցներով ցանկանում է խուսափել ղարաբաղյան հակամարտության ռազմական լուծումից: 2008-ին Վրաստանի հետ պատերազմից հետո Մոսկվան գիտակցում է, որ տարածաշրջանում ուժի այդպիսի եւս մեկ դրսեւորման դեպքում կկորցնի ոչ միայն միջազգային ասպարեզում վստահությունը, այլ նաեւ կփչացնի Բաքվի հետ Մոսկվայի կապերը»,- նշել է փորձագետը: Նա ավելացրել է, որ ԱՄՆ-ը հնարավորությունների լայն շրջանակ չունի՝ Կովկասում պատերազմի մեջ ներգրավվելու համար: Եթե Բաքուն պատերազմ սանձազերծի, ԱՄՆ-ի կողմից լուրջ արձագանք չի հաջորդի, նշել է ամերիկացի փորձագետը:
