Երեկ «Նարեկացի» արվեստի միությունում կայացավ ցուցահանդես՝ նվիրված նկարիչ Կորյուն Նիկողոսյանի հիշատակին: Իր ապրած 37 տարիների ընթացքում արվեստագետը հասցրել է ստեղծել մոտ 100 աշխատանք, որոնք ցուցադրվել են Հայաստանում, Ռուսաստանում եւ Դանիայում։ Այժմ դրանք ցուցադրվում են նրա անունը կրող տուն-թանգարանում։ Տարիներ շարունակ գամված լինելով անկողնուն՝ Կ. Նիկողոսյանը աշխատել է մոր օգնությամբ՝ կյանքի ու նրա հանդեպ իր հույզերն ու զգացումները արտահայտելով հիմնականում տաք, լուսավոր գույներով։ Ժամանակին Կ. Նիկողոսյանի արվեստը բարձր են գնահատել Մարտիրոս Սարյանը, Մինաս Ավետիսյանը եւ ուրիշներ։ «Նարեկացիում» ներկայացվեցին ոչ միայն հեղինակի տարբեր տարիների ստեղծագործությունները, այլեւ նկարչի մասին պատմող վավերագրական ֆիլմ ցուցադրվեց:
