Կենտրոն եւ Նորք-Մարաշ համայնքների ընդհանուր իրավասության դատարանում երեկ սկսվեց «Ինֆորմացիայի ազատության կենտրոնի» (լուսանկարում ԻԱԿ նախագահ՝ Շուշան Դոյդոյան)հայցի քննությունը՝ ընդդեմ թիվ 2 բուժմիավորման: «Ինֆորմացիայի ազատության կենտրոն» հասարակական կազմակերպությունը հուլիսի 10-ին դիմել էր բուժմիավորմանը՝ խնդրելով տրամադրել հետեւյալ տեղեկությունները.
1. Թիվ 2 բուժմիավորման մանկական պոլիկլինիկայում մինչեւ 7 տարեկան երեխաներին տրամադրվող դեղերի հատկացման կարգը:
2. Առկա անվճար տրամադրվող դեղերի ցուցակի պատճենը:
3. Եթե երեխան հիվանդ է եւ բուժման համար անհրաժեշտ դեղորայքը ներառված չէ վերոնշյալ ցուցակում, ապա կա՞ այլ տարբերակ` մինչեւ 7 տարեկան երեխային անվճար տրամադրելու այդ դեղը:
4. Ի՞նչ անի ծնողը, եթե անվճար տրամադրվող դեղերի ցուցակում կա դեղ, որի կարիքն ունի հիվանդ երեխան եւ այն բժշկի կողմից չի տրամադրվում:
Բուժմիավորումը ԻԱԿ-ի հարցմանը որեւէ պատասխան չի տվել: Հետեւաբար, ԻԱԿ-ն ընտրել էր դատարանի ճանապարհը: Կենտրոնը պահանջում էր պարտավորեցնել բուժմիավորմանը՝ տրամադրել պահանջված տեղեկությունը, իսկ գլխավոր տնօրեն Տիգրան Խաչատրյանին ենթարկել վարչական պատասխանատվության` տուգանքի, 50 000 դրամի չափով:
