Թուրքիայի վարչապետ Ռեջեփ Թայիփ Էրդողանը երկու տարի ընդմիջումից հետո կրկին մեկնում է Վաշինգտոն։ Դեկտեմբերի 7-ին նա կհանդիպի ԱՄՆ նախագահ Բարաք Օբամայի հետ։ Վկայակոչելով թուրքական «Haberaktuel»-ը՝ «News.am»-ը փոխանցում է, որ երկու երկրների ղեկավարները կքննարկեն PKK-ի դեմ պայքարի, Կիպրոսի, Իրանի միջուկային խնդիրները, Հայաստանի հետ հարաբերությունների կարգավորումը, նաեւ ԼՂ հիմնախնդիրը: Թերթի փոխանցմամբ, Վաշինգտոնը կշեշտի, որ կարեւոր է երկու երկրների խորհրդարանների կողմից արձանագրությունների վավերացումը։ Թուրքիան կրկին կշեշտի, թե Ադրբեջանի եւ Հայաստանի միջեւ Լեռնային Ղարաբաղի խնդրում առանց տեղաշարժի՝ Թուրքիայի խորհրդարանում դժվար կլինի վավերացնել ստորագրված հայ-թուրքական արձանագրությունները։
Էրդողան-Օբամա քննարկումների սեղանին կլինի նաեւ Աֆղանստանի խնդիրը, Իսրայել-Թուրքիա հարաբերությունների լարվածության թուլացումը եւ Nabucco-ի նախագիծը։
