Սյունիքի մարզի Արծվանիկ գյուղում տեղի ունեցավ ճապոնական կառավարության տրամադրած դրամաշնորհի եւ ՀՀ գլխավոր դատախազի նվիրատվության միջոցներով վերանորոգված «Արծվաբույն» տարեցների շուրջօրյա սպասարկման կենտրոնի բացման հանդիսավոր արարողությունը: Միջոցառմանը մասնակցում էին ՀՀ գլխավոր դատախազ Աղվան Հովսեփյանը, «Առաքելություն Հայաստան» բարեգործական հասարակական կազմակերպության նախագահ Հռիփսիմե Կիրակոսյանը, հանրապետական եւ մարզային իշխանությունների ներկայացուցիչներ, մարզի բնակիչներ։
2006թ.-ին Սյունիքի մարզպետարանը «Առաքելություն Հայաստան» ԲՀԿ-ին Արծվանիկ գյուղում հատկացրեց տարածք, որի մի մասը կազմակերպությունը վերակառուցեց, վերանորոգեց եւ մարզում հիմնեց տարեցների շուրջօրյա սպասարկման կենտրոն: Կենտրոնն անվանվեց «Արծվաբույն», եւ այստեղ բնակություն հաստատեցին 12 անօթեւան տարեցներ ու հաշմանդամներ։ 2008թ.-ին «Առաքելություն Հայաստան» ԲՀԿ-ն դիմեց տարբեր միջազգային ու տեղական հովանավորների՝ կենտրոնի ամբողջական վերանորոգման համար։ Ճապոնական կառավարությունը տարեցների շուրջօրյա սպասարկման կենտրոնի ընդարձակման, տարածքի վերանորոգման եւ հարդարման աշխատանքներն իրականացնելու նպատակով տրամադրեց շուրջ 30 մլն ՀՀ դրամ:
Կենտրոնի ջեռուցումն իրականացվեց «Առաքելություն Հայաստան» ԲՀԿ-ին նվիրաբերած Աղվան Հովսեփյանի լուսանկարների վաճառքից գոյացած 14 մլն դրամի միջոցներով, որով անցկացվեց ջեռուցման ժամանակակից համակարգ, կառուցվեց կաթսայատուն, ապահովվեց վերջինիս մեկնարկման ու գործարկման համար անհրաժեշտ վառելիքի զգալի մասը։
