Ուղիղ 2 օր առաջ «Շիրակջրմուղկոյուղու» նորանշանակ պետ Ֆեդիկ Գալստյանը նշում էր իր պաշտոնավարման 100 օրը: Այս կապակցությամբ նա ոչ միայն մամուլի ասուլիս տվեց, այլեւ հյուրընկալվեց Գյումրիի «Շանթ» հեռուստաընկերության ուղիղ եթերում՝ խոսելով իր արած ու չարած աշխատանքների մասին, անգամ իր մոտ հրավիրելով բողոք ունեցող հեռուստադիտողներին: Սակայն չանցած մեկ օր՝ Ջրմուղի տնօրենին պաշտոնազրկեցին՝ նրա փոխարեն վերադարձնելով հին տնօրեն Վարդան Մարտիրոսյանին: Թե ի՞նչն էր Ֆեդիկ Գալստյանին 100 օրվա կապակցությամբ այսպիսի «սյուրպրիզ» անելու իրական պատճառը, մեզ չհաջողվեց ճշտել: «Շիրակջրմուղկոյուղուց» «Առավոտին» հայտնեցին, որ նկատի ունենալով նրա բազմամյա վաստակն ու փորձը՝ նրա պաշտոնը բարձրացրել են, մինչդեռ «Առավոտի» աղբյուրները պնդում են, որ նրան Լոռու Ջրմուղ են ուղարկել:
Տեղեկացնենք, որ Ֆեդիկ Գալստյանը Վանաձորից է, նա սկզբում գրեթե ամեն օր Վանաձորից կտրում-հասնում էր Գյումրի, վերջին շրջանում էլ տուն էր վարձել Գյումրիի Տեքստիլ թաղամասում, որն էլ ամենայն հավանականությամբ էժան չի նստել «Շիրակջրմուղի» աշխատանքները բարելավելու համար մրցույթ շահած կազմակերպության վրա:
