Թուրքիայում սկսել են տեղանունները վերափոխել հին՝ հայկական եւ քրդական անուններով։ Այս մասին տեղեկացնում է «news.am»-ը՝ վկայակոչելով թուրքական «Radikal»-ը։ Թուրքիայում տեղանունների հին անվանումների կրկին վերադարձը մեծ աշխուժություն է առաջացրել։ Թուրքիայի ներքին գործերի նախարար Բեշիր Աթալայը վերջերս հայտարարել էր, որ դրական է համարում տեղանունների անվանափոխումը հին անուններով։
News.am-ը հիշեցնում է, որ այս տարվա օգոստոսի սկզբին, երբ Թուրքիայի նախագահ Աբդուլա Գյուլը այցելել էր Բիթլիսի Գյուրոյմակ ավան, որտեղ նա այն անվանել էր հին՝ հայկական անունով, այսինքն՝ Նորշեն, սա մեծ աղմուկ էր բարձրացրել թուրք ընդդիմադիրների շրջանում։ Այս դեպքից հետո Գյուրոյմակի քաղաքապետարանը նախաձեռնել է ավանի անունը վերափոխել Նորշենի։
Աղբյուրի փոխանցմամբ, վերջերս թուրքական գրախանութներում հայտնված Թուրքիայի քարտեզներում հետաքրքիր մի երեւույթ էլ է նկատվել։ Օրինակ, Մշո Սուրբ Կարապետ վանքի տեղում առաջացած Չինգիլա գյուղը կրկին անվանվել է Կարապետ, իսկ Վարագավանքի գտնվելու վայրը՝ Բաքրաչլը գյուղը, նշված է որպես Վարագ։
Վանա Աղթամարի կղզին Թուրքիայում ընդունված էր կոչել Աքդամար (Akdamar), իսկ այժմ հիմնականում սկսվել է օգտագործվել Ահթամար (Ahtamar) ձեւը:
