Վրացական երկաթգծի երկայնքով ձգվող 600 կմ օպտիկամանրաթելային մալուխը, որը պատկանում է «Railway Telecom» ընկերությանը, երեկ կայացած աճուրդում վաճառվել է նիդեռլանդական կապիտալով «LinkTelecom Georgia» ընկերությանը։
Բաժնետոմսերը վաճառվել են $14 մլրդ 344 մլն 800 հազարով: Նշենք, որ հենց այդ մալուխի միջոցով է հայկական «Ֆայբերնեթ քոմյունիքեյշն» ընկերությունը, որի մասնաբաժինը մեծածախ ինտերնետի շուկայում 90% է, միանում ինտերնետին: «cdaily.am» կայքի տեղեկացմամբ, աճուրդին մասնակցել է 4 ընկերություն, 3-ը՝ վրացական, եւ մեկը՝ միջազգային: Աղբյուրի տեղեկացմամբ, աճուրդին կարող էր մասնակցել ցանկացած ընկերություն, հետեւապես սա լավ հնարավորություն էր Հայաստանի պրովայդերների համար: Եթե նրանցից մեկը ձեռք բերեր «Railway Telecom»-ի բաժնետոմսերի փաթեթը, ապա հնարավոր կլիներ ոչ միայն բարձրացնել Հայաստանում ինտերնետի մատակարարման հուսալիությունը, այլեւ նվազեցնել սակագները:
