Երեկ հանրապետության վարչապետ Տիգրան Սարգսյանը այցելել է «Գրանդ Քենդի» ընկերություն: Գործարանի տպարանում, հրուշակեղենի արտադրամասերում շրջելուց եւ ընկերության տեխնոլոգիական հնարավորություններին եւ արտադրության գործընթացին ծանոթանալուց հետո, վարչապետը պատասխանել է նաեւ լրագրողներից մեկի այն հարցին, թե «Գրանդ Քենդին» իր արտադրատեսակների, հիմնականում՝ շոկոլադի համար օգտագործում է խորհրդային ժամանակներից «ժառանգություն մնացած» ապրանքանիշեր, օրինակ`«Բելոչկա», «Կրասնայա շապոչկա», ինչի արդյունքում ռուսական եւ ուկրաինական նույնանուն արտադրատեսակները չեն կարողանում Հայաստան ներկրվել: «Դա շուկայական կանոններին համապատասխան բնական մրցակցություն է: Մենք պետք է հետեւենք, որպեսզի մրցակցությունը լինի արդար, օրենքի շրջանակներում, որովհետեւ մրցակցությունից շահում են մեր սպառողները, մեր քաղաքացիները: Պետությունների խնդիրն այն է, որպեսզի խաղի կանոնները լինեն հստակ, քանի որ դրանց փոփոխությունը խաթարում է մրցակցությունը եւ կարող է այս կամ այն արտադրողին շուկայից դուրս մղել: Բնականաբար, հետեւելու ենք, որ կանոնները չփոխվեն կամ փոխվեն այնպես, որ չհարվածեն «Գրանդ Քենդիին»,- ասել է Տիգրան Սարգսյանը: Վարչապետը նշել է նաեւ, որ այսօր «Գրանդ Քենդին» հաջողությամբ զարգացնում է իր բիզնեսը, ունի հազարավոր աշխատատեղեր, մյուս կողմից էլ փորձ է արվում գնել հիմնականում հայկական հումք, որովհետեւ դա խթանում է տարբեր, մասնավորապես՝ գյուղատնտեսության ոլորտի զարգացումը:
