![\"\"](\"https://www.aravot.am/2009/aravot_arm/November/25/p6.jpg\")
Հենց այս պատճառով էլ տնտեսագետ Թաթուլ Մանասերյանը որեւէ կանխատեսում դժվարանում է անել:
«Ես բազմազավակ հայր եմ եւ այս սեզոնին, երբ իմ երեխաները մրսում, հիվանդանում են, ես էլ եմ ուզում դեղ գնել: Բայց ոչ մի համեստ աշխատավարձով ապրող քաղաքացի իրեն չի կարող թույլ տալ այդքան թանկ դեղ գնել: Մեր պետությունը պետք է ամեն ինչ աներ, որպեսզի այս համատարած գնաճի պայմաններում գոնե դեղերը չթանկացնեին, իսկ սննդի մասին էլ չեմ ասում: Ես եմ՝ մի կերպ կարողանում եմ դեղ գնել, թեկուզ պարտք կանեմ՝ կգնեմ, բայց հարցը միայն ես չեմ»,- երեկ «Փաստարկ» ակումբում հրավիրած ասուլիսում թանկացումների համար այսպիսի դժգոհություն հայտնեց տնտեսագետ Թաթուլ Մանասերյանը:
Ըստ նրա, Տնտեսական մրցակցության պաշտպանության հանձնաժողովը պետք է այնպես աներ, որ անհիմն գնաճ ստեղծող տնտեսվարողները պատասխանատվություն կրեին դրա համար. «Նրանք աշխատավարձ են ստանում եւ պարտավոր էին գոնե առաջին 5 գին բարձրացնողներին տուգանել: Եթե նույնիսկ տուգանեին էլ, դրանք այնքան սիմվոլիկ գումարներ են, որ չեն կարող փոխհատուցել մարդու առողջությունն ու կյանքը»:
Անդրադառնալով մեր կառավարության վերցրած մեծ վարկերին՝ պարոն Մանասերյանն ասաց. «Նորածինը, որն այսօր ծնվում է Հայաստանում, արդեն ունի իր ուսերին մի քանի 1000 դոլարի պարտք: Մինչդեռ Եվրոպայում, նույնիսկ արաբական երկրներում երեխան ծնվում է գումարը հետը, ոչ թե պարտքերով»: Ճգնաժամի հետ կապված պարոն Մանասերյանն ասաց, որ մեր կառավարությունը պետք է կարողանա առաջին հերթին զարգացնել մեր մրցունակությունը տարածաշրջանում եւ պետք է սկսել էներգետիկայի ոլորտից. «Ներկայումս Հայաստանը էներգետիկայի ոլորտում օգտագործում է իր ռեսուրսների 1/3-րդ մասը: Մենք կարող ենք արտահանել 4.5 մլրդ կվտ/ժամ էլեկտրաէներգիա, ինչը սկզբի համար լավ ցուցանիշ է»:
Ըստ պարոն Մանասերյանի, մեր գյուղատնտեսությունը մրցունակ չէ եւ առաջիկայում հույս էլ չկա, որ կդառնա մրցունակ: Շատ տնտեսագետներ գտնում են, որ մեր երկրի համար չափազանց դժվար է լինելու հատկապես 2014-ը, քանի որ այդ ժամանակ վարկերը ստիպված ենք լինելու վերադարձնել եւ ճգնաժամի իրական ազդեցությունը զգալ: Մեր հարցին՝ դուք է՞լ եք կարծում, որ Հայաստանի համար այդ տարի շատ ծանր է լինելու՝ պարոն Մանասերյանը պատասխանեց. «Ես որեւէ կանխատեսում չեմ անի, որովհետեւ դա անում են նորմալ զարգացող երկրի համար, իսկ Հայաստանի տնտեսությունը պարադոքսներով է ապրում, որտեղ ոչինչ չի բացառվում»:
