![\"\"](\"https://www.aravot.am/2009/aravot_arm/November/24/p19.jpg\")
Ֆիլիպինների հարավում գտնվող Մագինդանաո գավառում հայտնաբերվել է 21 գլխատված դիակ: Բոլոր սպանվածները՝ 13 կին եւ 8 տղամարդ, եղել են քաղաքական գործիչներ կամ լրագրողներ, վերջերս ֆիլիպինցի գրոհայինների կողմից պատանդ վերցված խմբի անդամներ: «Մեր զինվորականները հասել են այն շրջան, որտեղ թաքնվել են գրոհայինները՝ իրենց հետ տանելով նաեւ առեւանգված խմբի անդամներին: Մենք շարունակում ենք «սանրել» ողջ տարածքը՝ պատանդ վերցված մարդկանց գտնելու համար»,- «BBC»-ի փոխանցմամբ, հայտարարել է Ֆիլիպինների բանակի բարձրաստիճան սպա Ալֆրեդո Կայտոն:
Այս գավառում 2010թ. մայիսին տեղական իշխանությունների ընտրություններ են անցկացվելու: Թեկնածուների գրանցումը սկսվել էր դեռ նոյեմբերի սկզբներին: Պատանդներն առեւանգվել էին զինյալների խմբի կողմից՝ թեկնածուներից մեկի նախընտրական շտաբ տանող ճանապարհին: Երկրի իշխանությունները ենթադրում են, որ խմբի անդամները աջակցել են առաջիկա ընտրություններում առաջադրված եւ զինյալների համար անցանկալի թեկնածուի: Նրանք մարդկանց առեւանգելու եւ պատանդների սպանության մեջ մեղադրում են կրոնական հայացքներ ունեցող ընդդիմադիր քաղաքական գործիչներից մեկին: Որոշ տեղեկություններով, Մագինդանաո գավառում առեւանգված պատանդներից մեկը այդ գավառի ղեկավարի պաշտոնում առաջադրվելու հայտ ներկայացրած քաղաքական գործիչներից մեկի կինն է: Ընտրարշավը մեկնարկել է անցյալ շաբաթ:
Աղբյուրը նշում է, որ գավառում իրավիճակը առանձնանում է սուր քաղաքական դիմակայությամբ:
