«Կոալիցիոն համաձայնությունը կամ կուսակցական ներքին պայմանավորվածությունները մեզ մոտ վեր են ոչ միայն օրենքից եւ Սահմանադրությունից, այլեւ, շատ կներեք, գալիս են գրավելու նաեւ աստվածային ճշմարտությունների տեղը: Սա բարոյական ճգնաժամ է»,- երեկ մեկնաբանելով ԲՀԿ-ի կողմից աշխատանքի եւ սոցիալական հարցերի նախարարին պաշտոնից հեռացնելը՝ ասաց «Ժառանգություն» խմբակցության անդամ Լարիսա Ալավերդյանը: Նաեւ ասաց. «Ով աշխատավարձ է տալիս «իր» նախարարներին (նկատի ունի այն, որ ԲՀԿ նախագահ Գագիկ Ծառուկյանը հայտարարել էր, որ ինքն իր նախարարներին գումար է տալիս, որ լավ աշխատեն- խմբ.), նա էլ հանում է: Սա էլ ժամանակին չարժանացավ վերլուծության: Սա անձնավորված չէ, ես խնդիր չունեմ մարդկային արժանապատվությանը կպնելու, բայց քաղաքակրթական կոնֆլիկտի մեջ ենք մտնում ինքներս մեզ հետ»:
Իսկ Անահիտ Բախշյանը հավելեց. «Քանի դեռ իշխանությունը, ի դեմս քաղաքական կոալիցիայի, ինքը չի վերլուծում իր մեջ մտած քաղաքական ուժերի գործունեությունը եւ գնահատական չի տալիս այդ ամենին, սա շարունակվելու է»:
