«ՀԱՏԻՍԻ» ԱՌԱՋԻՆ ՀԱՂԹԱՆԱԿԸ
Երեկ բասկետբոլի «Հատիս» կանանց թիմը «Միկա» մարզադահլիճում 103։99 հաշվով հաղթեց Ռուսաստանի «Չեւակատա»-ին։ Սա «Հատիսի» առաջին հաղթանակն էր Եվրոպայի գավաթի խաղարկության մրցաշարում։
ՄԻՔԱՅԵԼ ՄԿՐՏՉՅԱՆՆ ԱՌԱՋԱՏԱՐՆ Է
Անթալիայում շարունակվող շախմատի աշխարհի պատանիների անհատական առաջնությունում 10 տարեկան տղաների պայքարը միանձնյա գլխավորում է հայաստանցի Միքայել Մկրտչյանը, որը յոթ հնարավորից վաստակել է 6,5 միավոր: Հաջող են հանդես գալիս նաեւ մեր 14 տարեկանները: Հովհաննես Գաբուզյանը 6,0 միավորով ընթանում է երկրորդ հորիզոնականում եւ առաջատարից ետ է մնում ընդամենը կես քայլով: Իսկ Կարեն Գրիգորյանը 5,5 միավորով չորրորդն է: Մրցանակային տեղի հավակնում է նաեւ 5,5 միավոր վաստակած Վահե Բաղդասարյանը (16 տարեկաններ): Ճիշտ է, երեկ կայացած 8-րդ տուրից առաջ 7-րդն էր, սակայն պատանին ընդամենը կես միավորով էր ետ մնում առաջատարից:
ԳԱԲԻՆ ՈՒ ՏԻԳՐԱՆԸ ԽԱՆՏԻ-ՄԱՆՍԻՅՍԿՈՒՄ ԵՆ
Այսօր Կալմիկիայի մայրաքաղաքում մեկնարկում է շախմատի աշխարհի գավաթի խաղարկությունը, որտեղ Հայաստանը ներկայացնում են օլիմպիական չեմպիոններ, գրոսմայստերներ Գաբրիել Սարգսյանն ու Տիգրան Պետրոսյանը:
32 ԵՐՋԱՆԻԿ ՀԱՎԱՔԱԿԱՆՆԵՐԸ
Հայտնի դարձան ֆուտբոլի բոլոր 32 ազգային հավաքականները, որոնք 2010 թվականին կմասնակցեն Հարավային Աֆրիկայում մեկնարկող աշխարհի առաջնության եզրափակիչ մրցաշարին:
Եվրոպա- Դանիա, Ֆրանսիա, Հունաստան, Նիդեռլանդներ, Սերբիա, Սլովենիա, Շվեյցարիա, Անգլիա, Գերմանիա, Իտալիա, Պորտուգալիա, Սլովակիա, Իսպանիա:
Աֆրիկա- Ալժիր, Կոտ դ Իվուար, Նիգերիա, Կամերուն, Գանա, ՀԱՀ:
Ասիա- Ավստրալիա, Ճապոնիա, Հյուսիսային Կորեա, Հարավային Կորեա:
Հյուսիսային եւ Կենտրոնական Ամերիկա- Հոնդուրաս, ԱՄՆ, Մեքսիկա:
Հարավային Ամերիկա- Արգենտինա, Չիլի, Բրազիլիա, Պարագվայ, Ուրուգվայ:
Օվկիանիա եւ Նոր Զելանդիա:
Աշխարհի առաջնության վիճակահանությունը կայանալու է դեկտեմբերի 4-ին՝ Քեյփթաունում: ՖԻՖԱ-ն առայժմ չի հայտարարել, թե հավաքականներն ինչպե՞ս են բաժանվելու ըստ զամբյուղների:
