Երեկ Կենտրոն եւ Նորք-Մարաշ համայնքների ընդհանուր իրավասության դատարանում, Գագիկ Ավետիսյանի նախագահությամբ, պետք է շարունակվեր ՀՀ ոստիկանության Երեւան քաղաքի պետական պահպանության ծառայության 5-րդ վաշտի ոստիկաններ Անդրանիկ Մանուկյանի եւ Գեղամ Գրիգորյանի դեմ հարուցված քրեական գործի դատաքննությունը: Նրանք մեղադրվում են «Մարտի 1»-ի գործով՝ Մաշտոցի պողոտայում ցուցարարների նկատմամբ ոչ իրավաչափ գործողություններ կատարելու համար: Դատական նիստից առաջ ոստիկանների պաշտպանը՝ Վաղարշակ Գրիգորյանը դիմել էր դատարան, հայտնելով, որ հիվանդ լինելու պատճառով չի կարող ներկայանալ նիստին: Հիշեցնենք, որ այս դատարանում մեկ այլ դատավորի մոտ՝ Գագիկ Պողոսյանի վարույթում է գտնվում «Մարտի 1»-ի գործով ոստիկաններ Գեղամ Հարությունյանի եւ Հովհաննես Ղուկասյանի դեմ հարուցված քրգործը:
