Հունաստանում ընդհարվել են անարխիստներն ու ոստիկանները

Նոյեմբերի 17-ին Հունաստանը նշել է 1973թ. «սեւ գնդապետների» խունտայի կողմից ուսանողների ապստամբությունը ճնշելու հերթական տարելիցը, որի առնչությամբ կազմակերպված ցույցերին մասնակցել է մինչեւ 10 հազար մարդ: Երեքշաբթի երեկոյան երկրի մայրաքաղաքում բախումներ են եղել անարխիստների եւ ոստիկանության միջեւ, որի արդյունքում ամենաքիչը 13 ոստիկան վիրավորվել է, նրանցից մեկը գտնվում է ծանր վիճակում, ձերբակալվել է մոտ 200 երիտասարդ: «Ինտերֆաքսի» փոխանցմամբ, 36 տարի առաջ տեղի ունեցած ողբերգական իրադարձությունների առիթով կազմակերպված բողոքի ակցիա է տեղի ունեցել Աթենքում՝ ԱՄՆ դեսպանատան մոտ: Ակցիայի մասնակիցները 1967-74 թվերին «սեւ գնդապետների» ռեժիմը պաշտպանած Վաշինգտոնի վարած «իմպերիալիստական քաղաքականության» դեմ ուղղված կարգախոսներ են վանկարկել:
Տեղական ԶԼՄ-ների փոխանցմամբ, Աթենքի Ատտիկա շրջանում անարխիստների մի խումբ քարեր է նետել ոստիկանների վրա: Վերջիններս դրան նախ չեն պատասխանել, բայց ավելի ուշ ձերբակալել են քար նետած անարխիստներից մեկին, որին էլ ազատելու համար նրա ընկերները հարձակվել են ոստիկանների վրա: Ընդհարումից հետո անարխիստները թաքնվել են: Մեկ այլ շրջանում անարխիստները այրել են աղբամաններն ու դրանք գլորել են ոստիկանների ուղղությամբ: Իրավապահները նրանց ցրել են արցունքաբեր գազի եւ ձայնային նռնակների օգնությամբ:
Նոյեմբերի 17-ին Աթենքի կենտրոնը տեղի ունեցած երթերի պատճառով փակ է եղել, որի հետեւանքվ ավտոճանապարհներին նաեւ խցանումներ են առաջացել: Ընդհանուր առմամբ, մայրաքաղաքի փողոցներում անվտանգությունն ապահովելու գործում ներգրավված է եղել մոտ վեց հազար իրավապահ: