Արցախյան հերոսամարտում զոհված Լոռու մարզի Բազում համայնքի 3 քաջորդիների՝ 1987 եւ 1992 ուստարվա շրջանավարտներ Արամ Ծատուրյանի, Ասատուր Սելիմյանի եւ Լավրենտ Գրիգորյանի հիշատակը հավերժացնող խաչքար կանգնեցնելու գաղափարը վաղուց հանգիստ չէր տալիս Բազումի դպրոցի տնօրեն Մեխակ Ալավերդյանին: Խաչքարի տեղադրման թույլտվություն ստանալու խնդրանքով նա դիմել է մարզային իշխանություններին եւ ստացել նրանց հավանությունը: Խաչքարը կերտել է քարի գեղարվեստական մշակման ժողովրդական վարպետ Սերգեյ Դանիելյանը: Խաչքարի՝ օրերս կայացած բացման արարողությանը ներկա էին համայնքի բնակիչները, դպրոցի ուսուցչական եւ աշակերտական կազմը: Նախաձեռնության հեղինակ Մ. Ալավերդյանի եւ զոհվածների մայրերի ձեռքերով կատարվեց խաչքարի բացումը: Գուգարքի տարածաշրջանի հոգեւոր հովիվ տեր Սողոմոն քահանա Ավետիսյանը հնչեցրեց Տերունական աղոթքը, կատարեց խաչքարի օրհնության կարգ:
Դպրոցի աշակերտները հնչեցրին Հայաստանի օրհներգը եւ հայրենասիրական թեմայով ստեղծագործություններ: Յուրաքանչյուր ելույթի ժամանակ ներկաների եւ հատկապես հերոսների մայրերի աչքերին արտասուք էր նշմարվում, բայց, ինչպես հավաստեցին՝ դրանք թեեւ խոր վշտի, սակայն հուսահատության արցունքներ չէին, այլ հպարտության ու լավատեսության:
«Այս խաչքարը կարեւոր ու նշանակալից է այնքանով, որ անմահացան իմ աշակերտները, սա յուրաքանչյուր ուսումնական տարեսկզբին ու տարեվերջին երդման վայր կդառնա»,- ասաց Մ. Ալավերդյանը:
«Իմ լավ ընկեր Մեխակ Ալավերդյանը դիմեց ինձ, եւ ես հաճույքով համաձայնեցի, աշակերտիս օգնությամբ կարճ ժամանակում խաչքարը կերտեցինք, եւ այն շուտով իր տեղը գտավ բակում, աղբյուրն էլ իմ կողմից նվիրեցի»,- հայտարարեց վարպետ Սերգեյ Դանիելյանը:
