ԶՈՀ՝ ՇԱՀՈՒՄՅԱՆՈՒՄ

Այս տարվա հուլիսին, սեպտեմբերին եւ այս ամիս տեղեկացրել ենք, որ Կապանի «Deno Gold Mining» ընկերության կողմից Շահումյանի ոսկու բազմամետաղային հանքավայրի շահագործման արդյունքում բանավանի բնակիչների կյանքը վտանգվում է, սողանքներ են սկսվել, սակայն այս առթիվ բնակիչների բողոքները մնում են անպատասխան, անգամ դատարանն է մերժել նրանց հայցը: Ու մինչ պատրաստվում է վերաքննիչ բողոքը, նշված հանքում նոյեմբերի 15-ին մարդ է զոհվել: Մահվան փաստի առթիվ ստեղծվել է հատուկ հանձնաժողով: Մահվան պատճառները հետաքննվում են:
Կապանի «Էկոլոգիական անվտանգության ապահովման եւ ժողովրդավարության զարգացման» հ/կ-ն, որ շահումյանցիների շահերն է ներկայացնում դատարանում, սեփական հետաքննությունն է անցկացնում: Կազմակերպությունը հատուկ ուշադրություն է դարձնում  աշխատողի զոհվելու վայրին, քանի որ հայտնի է՝ Սյունիքի մարզի ընդհանուր իրավասության դատարանն  արգելք է դրել հանքանյութի արդյունահանման գոտում գտնվող Շահումյան բանավանում ստորգետնյա եւ վերգետնյա աշխատանքների վրա՝ նկատի ունենալով մարդկանց կյանքին եւ առողջությանը սպառնացող վտանգները:
Ըստ չճշտված տվյալների, «Deno Gold Mining» ընկերությունը ներքին հրամանով արգելել է տեղեկատվություն տրամադրել՝ մինչեւ ընկերության պաշտոնական հաղորդագրության հրապարակվելը: