![\"\"](\"https://www.aravot.am/2009/aravot_arm/November/14/p13.jpg\")
ԱՄՆ նախագահ Բարաք Օբաման, որը սկսել է իր առաջին «ասիական շրջայցը», երեկ ժամանել է Ճապոնիա: Ութ օրերի ընթացքում նա այցելելու է նաեւ Չինաստան, Հարավային Կորեա, Սինգապուրում մասնակցելու է Ասիական-խաղաղօվկիանոսյան տնտեսական համագործակցության անդամ երկրների գագաթաժողովին, որի շրջանակներում էլ նոյեմբերի 15-ին հանդիպելու է ՌԴ նախագահ Դմիտրի Մեդվեդեւի հետ: «BBC»-ի փոխանցմամբ, այս շրջայցի նպատակը ասիական երկրների ղեկավարների հետ նրանց տնտեսությունների աճին նպաստելուն ուղղված՝ ԱՄՆ-ի կողմից տնտեսական օգնություն տրամադրելու հարցի քննարկումն է: Այցից առաջ Ալյասկա նահանգում գտնվող «Էլենդորֆ» ռազմական ավիաբազայում զինվորների եւ սպաների հետ հանդիպման ժամանակ ունեցած իր ելույթում Օբաման անդրադարձել է նաեւ Աֆղանստան ամերիկյան լրացուցիչ ուժեր ուղարկելու հարցին: Նա զինվորներին խոստացել է ձեռնպահ մնալ այդ քայլից եւ իրենց՝ զինվորներին, Աֆղանստան չուղարկել, եթե միայն դա խիստ անհրաժեշտ չի լինի ԱՄՆ-ի պետական շահերը պաշտպանելու համար: Բայց անգամ այդպիսի որոշում ընդունելու դեպքում, ԱՄՆ նախագահը խոստացել է, որ դա կանի բացառապես այն դեպքում, երբ այդ հարցում ունենա ԱՄՆ հասարակության բավարար աջակցությունը:
Հիշեցնենք, որ ԱՄՆ-ում անցկացված հասարակական կարծիքի հարցախույզի արդյունքում ակնհայտ է դարձել, որ գնալով ավելի շատ ամերիկացիներ են հանդես գալիս ամերիկյան զինվորներին Աֆղանստան ուղարկելու դեմ:
