![\"\"](\"https://www.aravot.am/2009/aravot_arm/November/14/p9.jpg\")
Չինաստանի հյուսիսային, կենտրոնական եւ արեւելյան գավառներում տեղացած առատ ձյունը դարձել է 38 մարդու մահվան եւ հարյուրավոր քաղաքացիների վնասվածքների պատճառ: Այս մասին տեղեկացնում է «Ինտերֆաքսը»՝ հավելելով, որ զոհվածների թվում կան նաեւ երեխաներ: Հեբեյ եւ Հենան գավառներում տեղացած ձյան ծանրությունից փլվել են դպրոցական ճաշարանների տանիքները: Արդյունքում՝ վիրավորված դպրոցականների թվի մասին ոչինչ չի հաղորդվում, բայց ասվում է, որ վնասվածքներ ստացած շատ երեխաներ են հիվանդանոցներ տեղափոխվել:
Աղետի թիրախ դարձած շրջաններում գոյացած ձնակույտերի եւ սառցակալման պատճառով փակվել են բոլոր ճանապարհները, շրջափակման մեջ են հայտնվել տասնյակ հազարավոր ավտոմեքենաներ եւ միջազգային երթուղիներ իրականացնող ավտոբուսներ, վարորդները սկսել են սպառել մեքենայի վառելիքը՝ տաքանալու համար, նաեւ ճանապարհի համար վերցրած ուտելիքն ու ջուրը: Առատ տեղացած ձյունը դժվարություններ է հարուցել տուժած շրջաններին բեռներ, այդ թվում՝ մթերք հասցնելու համար:
Տարերային աղետի արդյունքում միայն Հեբեյ շրջանի կրած տնտեսական վնասը կազմել է ավելի քան 400 մլն յուան՝ 59 մլն դոլար, իսկ նյութական վնաս կրած մարդկանց թիվը հասել է մոտ 1,5 միլիոնի: Նման մասշտաբների հասած տարերային աղետ Չինաստանում վերջին 500 տարիներին տեղի չէր ունեցել:
