ԴԻԱԿԸ՝ ՃԱՄՓԵԶՐԻՆ
ՀՀ ոստիկանության տեղեկատվության վարչությունից տեղեկացրին, որ Քանաքեռի «Կորեայի ձոր» կոչվող տարածքում հայտնաբերվել է 78-ամյա Ֆրուզիկ Մկրտչյանի դիակը: Նախնական վարկածի համաձայն, անհայտ ավտոմեքենայի վարորդը «Հյուսիսային» ավտոկայանի մոտ վրաերթի է ենթարկել ծերունուն, ապա բուժօգնություն ցույց տալու պատրվակով Մկրտչյանին տեղափոխել է իր մեքենան: Ապա դիակը թողնելով ճամփեզրին, վարորդը դիմել է փախուստի:
ԱՐԿ՝ ԴՊՐՈՑԻ ԲԱԿՈՒՄ
ԱԻՆ փրկարար ծառայությունից երեկ տեղեկացրին, որ Տավուշի մարզի Այգեհովիտ գյուղի նախկին դպրոցի բակում ականանետի չպայթած արկ է հայտնաբերվել:
Իջեւանի թիվ 51191 զորամասի ինժեներական ծառայության սակրավորների կողմից արկը տեղափոխվել է անվտանգ տարածք եւ վնասազերծվել:
ԳԱԶԻՑ ԹՈՒՆԱՎՈՐՎԵԼ ԷՐ
Լոռու մարզից տեղեկություն է ստացվել, որ բնական գազից թունավորման կասկածանքով Վանաձորի թիվ 2 հիվանդանոց է տեղափոխվել նույն քաղաքի Ուսանողական 10/6 հասցեի բնակչուհի՝ 72-ամյա Ֆլորիկ Մելիքջանյանը: Ըստ բժիշկների՝ տուժածի առողջական վիճակը միջին ծանրության է, կյանքին վտանգ չի սպառնում:
ՄԱՀ՝ ԹՈՒՆԱՔԻՄԻԿԱՏԻՑ
Թունաքիմիկատից թունավորմամբ Վայոց ձորի Չիվա գյուղից Եղեգնաձորի հիվանդանոց էր տեղափոխվել Երեւանի բնակիչ՝ 27-ամյա Արման Սարգսյանը: Տուժածը, որը գտնվել է ծայրահեղ ծանր վիճակում, գիտակցության չգալով մահացել է:
ԵԴ-Ի ՎՃՌԻՆ ՍՊԱՍԵԼԻՍ
Մարդու իրավունքների եվրոպական դատարանը նոյեմբերի 3-ին լսեց թուրքագետ, դավաճանության հոդվածով 10 տարվա ազատազրկման դատապարտված թուրքագետ, լրագրող Մուրադ Բոջոլյանի բողոքը: Վերջինս 8,5 տարի գտնվում է ազատազրկման վայրում: ԵԴ վճռի մասին Բոջոլյանի ընտանիքին տեղյակ կպահվի գանգատը լսելուց 20 օր հետո:
