Քաղաքագետ Սուրեն Զոլյանը կարծում է, որ Թուրքիայի վարչապետ Ռեջեփ Թայիփ Էրդողանը ԱՄՆ իր այցի ժամանակ փորձելու է Սպիտակ տան ղեկավարությանը համոզել ճնշում գործադրել Հայաստանի վրա: Պաշտոնական Երեւանը, սակայն, ըստ նրա, անհանգստանալու կարիք չունի, քանի որ ԱՄՆ քաղաքական գործիչների մինչ օրս հնչեցրած հայտարարությունները Էրդողանի հույսերի համար հիմք չեն ծառայում: «Ա1+»-ի հետ զրույցում նա նշեց, թե Անկարան այսօր միջազգային ատյաններում փորձում է ցուցադրել, թե մեծ զիջումների է գնացել, եւ դրա դիմաց Հայաստանն էլ պետք է զիջումներ անի Ղարաբաղի հարցում: «Այս առումով, կարծում եմ, Հայաստանի այսօրվա իշխանությունների քայլերը արդարացված են»,- ասաց նա:
Սուրեն Զոլյանը նաեւ գտնում է, որ հայ-թուրքական արձանագրությունների հապշտապ վավերացումը չի բխում Հայաստանի շահերից, քանի որ արձանագրությունների քննարկման ժամանակ ի հայտ են եկել բազմաթիվ չլուծված խնդիրներ՝ իրավական դաշտ, առեւտրային հարաբերությունների կազմակերպում, սահմանային ռեժիմ: «Դրանք, անկախ արձանագրություններից, այսօր Հայաստանի իշխանությունների օրակարգում են, որոնց լուծման համար ժամանակ է անհրաժեշտ: Որքան թուրքական կողմը ձգձգի արձանագրությունների ստորագրումը, այդքան ավելի համարժեք ձեւով Հայաստանում կնախապատրաստվեն այդ գործընթացներին»,- նկատեց նա:
