Իրանում կվերականգնվի ձեռք կտրելու շարիաթական պատժամիջոցը

Իրանի ոստիկանությունը պատրաստ է կրկին գործողության մեջ դնել պատժի այնպիսի եղանակը, ինչպիսին ձեռքի անդամահատումն է, քանի որ առանց դրա՝ երկրում հանցավորության աստիճանը աճել է: «BBC»-ի փոխանցմամբ, այդ մասին երեկ տեղեկացրել է «Ebtekar» թերթը:

Իրանում մուսուլմանական իրավունքի համաձայն, այն մարդուն, որը մեղադրվում է երկրորդ անգամ գողություն կատարելու մեջ, սպառնում է մատների անդամահատում, թեեւ այդպիսի պատժամիջոցը շատ հազվադեպ է իրականացվում, հատկապես հրապարակայնորեն: «Մուսուլմանական իրավունքից բխող պատիժներ՝ հատկապես ձեռքի անդամահատում, չիրականացնելը հանգեցնում է Իրանում անկայունության աճին»,- հայտարարել է Իրանի քրեական ոստիկանության ղեկավար Ասքղար Ջաֆարին:

Նախկինում ՄԱԿ-ը եւ միջազգային իրավապաշտպան կազմակերպությունները քննադատել էին հանցավորության դեմ պայքարի այդօրինակ միջոցառումները, եւ վերջին մի քանի տարիների ընթացքում շարիաթի օրենքներով նախատեսված այդօրինակ դատավճիռներ գրեթե չեն կայացվել: