![\"\"](\"https://www.aravot.am/2009/aravot_arm/November/10/p11.jpg\")
Անցած ուրբաթ օրը Թաթարական նեղուցում վթարի ենթարկված Ռուսաստանի խաղաղօվկիանոսյան նավատորմի հակասուզանավային «Տու-142» ինքնաթիռը ո՛չ միջուկային եւ ո՛չ էլ սովորական զենքով սարքավորված չի եղել, որովհետեւ ինքնաթիռի անձնակազմը իրականացրել է ուսումնական թռիչք: «BBC»-ի փոխանցմամբ, այդ մասին ասված է ՌԴ պաշտպանության նախարարության հաղորդագրության մեջ: Աղբյուրը հիշեցնում է, որ «Տու-142»-ը սովորաբար հագեցված է ինչպես սովորական, այնպես էլ միջուկային ռազմամթերքով: Ինքնաթիռի կործանման պատճառները դեռեւս հայտնի չեն: Անձնակազմի 11 անդամների որոնողական աշխատանքները շարունակվում են:
Երկուշաբթի օրը առավոտյան՝ այն տեղանքում, որտեղ ենթադրաբար վթարի է ենթարկվել ինքնաթիռը, որոնողական աշխատանքներին միացել է նաեւ «Թը-14» նավը՝ Հեռավորարեւելյան տարածաշրջանային որոնողա-փրկարարական ջոկատի ջրասույզների մասնակցությամբ: Մինչ այդ, ինքնաթիռի անձնակազմի որոնումներն իրականացվել են խաղաղօվկիանոսյան նավատորմի նավերի, նաեւ ռազմաօդային ուժերի ինքնաթիռների եւ ուղղաթիռների ներգրավմամբ:
Աղբյուրի փոխանցմամբ, ինքնաթիռի կործանման երեք նախնական վարկած է քննարկվում՝ տեխնիկայի խափանում, մարդկային գործոն եւ արտաքին միջավայրի ազդեցություն:
