Այսօր «Կարեն Դեմիրճյան» մարզահամերգային համալիրում կկայանա «Հայադարան» համահայկական նախագծի շրջանակներում հրատարակված «Համահայկական գործարար անվանացանկ եւ գիդ-ուղեցույց» երկհատորյակի շնորհանդեսը՝ ՀՀ պետական ատյանների, ինչպես նաեւ՝ Հայաստանում, Արցախում եւ Սփյուռքում գործող գործարար շրջանակների ներկայացուցիչների մասնակցությամբ:
Ըստ ՀՀ Սփյուռքի նախարարության, «Հայադարան» համահայկական նախագիծը ունի նաեւ ինտերնետային տարբերակ. «հիմնական ռազմավարական նպատակն է՝ ստեղծել համահայկական տեղեկատվական դաշտ, որը կմիավորի աշխարհի տարբեր երկրներում գործող հայկական բոլոր կառույցներն ու կազմակերպությունները, կլրացնի եւ կհամակարգի տեղեկատվական դաշտում առկա բացը՝ ի նպաստ Հայաստանի զարգացման եւ հզորացման, եւ ինչ-որ առումով կմեղմացնի նաեւ կարոտախտի զգացումը, որն ունի հայրենի եզերքից հեռու յուրաքանչյուր հայ»:
Ուղեցույցի նպատակակետերն են Հայաստանում, Արցախում եւ Սփյուռքում գործող բիզնես-կառույցները, ՀՀ պետական ատյանները, Հայաստանում գործող դեսպանատները, հյուպատոսությունները, միջազգային կառույցները, արտերկրներում ՀՀ մշտական ներկայացուցչությունները եւ սփյուռքահայ համայնքները:
