Կարծում է «ԱրմենՏելի» տնօրենը՝ «Օրանժի» մուտքի վերաբերյալ
«ԱրմենՏել» ընկերության գլխավոր տնօրեն Իգոր Կլիմկոն երեկ լրագրողների հետ հանդիպման ընթացքում խոսել է բջջային կապի 3-րդ օպերատոր «Օրանժ» ընկերության սակագների եւ առաջարկվող ծառայությունների վերաբերյալ: Համեմատելով իր ղեկավարած ընկերությունը «Օրանժ Արմենիայի» հետ, Ի. Կլիմկոն նշել է. «Ոչ մի նարնջագույն հեղափոխություն էլ չեղավ: Ինչպես ինտերնետի, այնպես էլ բջջային կապի տրամադրման շուկայում «ԱրմենՏելի» առաջարկներն առավել մրցակցային են»: «ԱրմենՏելի» ղեկավարը բաժանորդներին խորհուրդ է տվել ուշադիր ուսումնասիրել «Օրանժի» կողմից առաջարկվող սակագներն ու համոզվել, որ դրանք դեմպինգային չեն: Ինչ վերաբերում է «Օրանժի»՝ 7,2 Մբ/վրկ արագությամբ շարժական ինտերնետի առավելությանը, Ի. Կլիմկոն ասել է, որ «ոչ մի առավելություն կամ եզակի առաջարկ չկա, քանի որ մյուս 2 բջջային օպերատորները նման կապ եւս ունեն»:
Ի. Կլիմկոն առիթը բաց չի թողել իր ղեկավարած ընկերությանը գովաբանելու համար, «ԱրմենՏելին» որակելով՝ որպես շուկայի նորարար:
