Աշխարհի առաջատար երկրների կենտրոնական բանկերը, փորձելով ապահովագրել իրենց պահուստները դոլարի անկումից, ակտիվորեն գնում են եվրո եւ իեն: Չի բացառվում, որ մոտ ապագայում ճապոնական եւ եվրոպական արժույթների նկատմամբ պահանջարկը կշարունակի աճել, իսկ դոլարի մասնաբաժինը ոսկու պահուստներում կկրճատվի: Այս մասին տեղեկացնում է «banker.am» կայքէջը: Վերջինս հղում անելով «Barclays Capital»-ին՝ նշում է, որ երկրորդ եռամսյակին ձեռք բերված դոլարի մասնաբաժինը կազմել է ռեկորդային ցածր՝ 37%, իսկ 1999-ին մասնաբաժինը կազմում էր 63%:
Արժույթի միջազգային հիմնադրամի տնտեսագետները հաշվարկել են, որ երկրորդ եռամսյակի արդյունքներով՝ եվրոյի մասնաբաժինը համաշխարհային արժութային պահուստներում հասել է 27,5%: 2000-ի վերջին այդ ցուցանիշը կազմում էր ընդամենը 18%: Կանխատեսվում է, որ մոտակա տարիներին բոլոր միջազգային պահուստների 30%-ը պահվելու է մեկ եվրոպական արժույթով: Պահանջարկ ունեն նաեւ ճապոնական իենը, բրիտանական ֆունտ ստերլինգը եւ հումք արտահանող երկրների արժույթները:
Ըստ միջազգային փորձագետների, մոտակա տարիներին համաշխարհային արժութային շուկաներում ոչ մի կտրուկ փոփոխություն չի սպասվում: ԱՄՆ-ի տնտեսությունը կմա աշխարհում խոշորագույնը, իսկ շատ արժույթներ չունեն դոլարին հատուկ հատկությունները, օրինակ՝ չինական յուանը:
