Երեկ կառավարության նիստում որոշվել է փոփոխություններ կատարել «Աշխատանքային օրենսգրքում»՝ աշխատանքային հարաբերությունների կարգավորման մեխանիզմները պարզեցնելու համար: Նախատեսվում է աշխատանքային պայմանագրի լուծման դեպքում՝ ծանուցման, արձակման նպաստի վճարման, նույն գործատուի մոտ այլ աշխատանքի փոխադրվելու դեպքում՝ վերջնահաշվարկի, փորձաշրջանի ընթացքում աշխատանքի վարձատրության կարգավորման նոր մեխանիզմներ, ինչպես նաեւ ներդնել աշխատանքային բանավոր պայմանագրի ինստիտուտը:
Նիստում հավանության է արժանացել նաեւ քաղաքացիական ծառայողների բազային աշխատավարձի մեծության եւ վարձատրության համակարգի վերաբերյալ զեկույցը: Ըստ այդ զեկույցի, պետք է ձեռնարկել մասնավոր հատվածի նկատմամբ պետական հատվածի աշխատավարձի մրցունակությանն ուղղված քայլեր:
2009-ի 4-րդ եռամսյակում պետբյուջեից 194 մլն 398 հազար դրամ տրամադրվել է Պետեկամուտների կոմիտեի համար որպես վարչական շենք «Կանազ» ընկերությանը պատկանող շինությունը ձեռք բերելու համար: Վերջինս էլ ստացված գումարով պետք է փակի պետբյուջեի պարտքը, վճարի աշխատողների կյանքին կամ առողջությանը պատճառված վնասի փոխհատուցման համար հաշվարկված 27,6 մլն դրամն ու որպես վարկ ստացած 70 մլն դրամ պարտքը:
