Երեկ մեկնարկեց ՀՀ ԳԱԱ արվեստի ինստիտուտի հիմնադրման 50-ամյակին նվիրված հանրապետական իններորդ գիտական նստաշրջանը: Ինչպես տեղեկացնում է ԳԱԱ տեղեկատվական-վերլուծական կենտրոնը՝ արվեստագիտության ասպարեզում իրենց բեղուն գործունեության համար Արվեստի ինստիտուտի վաստակաշատ գիտնականներ Մուրադ Հասրաթյանը եւ Գեւորգ Գյոլդակյանը պարգեւատրվեցին ՀՀ մշակույթի նախարարության ոսկե մեդալով: Արվեստի ինստիտուտի տնօրեն Արարատ Աղասյանը տեղեկացրեց, որ նստաշրջանի ընթացքում արվեստագիտության տարբեր ճյուղերի մասին ընթերցված շուրջ 40 զեկուցումները կհրատարակվեն ժողովածուի տեսքով: ՀՀ գիտության պետական կոմիտեի նախագահ Սամվել Հարությունյանն իր ողջույնի ելույթում ասաց, որ Արվեստի ինստիտուտը բավականին հաջողություններ է գրանցում: Նա կարեւորեց այն փաստը, որ ինստիտուտում երիտասարդները մեծ ուշադրության են արժանանում: Արվեստի ինստիտուտը գիտական միակ հաստատությունն է, որտեղ ուսումնասիրվում են հայ արվեստի գրեթե բոլոր ճյուղերը (կերպարվեստ, ճարտարապետություն, դեկորատիվ եւ կիրառական արվեստներ, երաժշտություն, թատրոն, կինո եւ հեռուստատեսություն): Ստեղծման պահին ինստիտուտում գործել են ճարտարապետության, կերպարվեստի, երաժշտության բաժինները, որոնց հետագայում միացել են ժողովրդական երաժշտության, կինոյի եւ հեռուստատեսության, կիրառական արվեստի բաժինները: Ինստիտուտում գործում են Արվեստաբանական գրադարանը, Ռուբեն Զարյանի անվան շեքսպիրագիտական կաբինետ-գրադարանը, Ժողովրդական երաժշտության բաժնի գրադարանը, Արամ Քոչարյանի անվան ձայնադարանը, Արվեստի ինստիտուտի արխիվը:
