Երեկ վաղ առավոտից ավտոբուսային եւ միկրոավտոբուսային մի շարք երթուղիների, մասնավորապես՝ թիվ 15, 2, 123, 65 եւ այլն, վարորդներ հրաժարվել են գիծը սպասարկել եւ գործադուլ են հայտարարել: Սովորաբար վարորդները գործադուլ են անում՝ գծատերերի սահմանած բարձր վարձավճարների դեմ, սակայն երեկվա գործադուլը, ինչպես «Առավոտին» տեղեկացրին Երեւանի քաղաքապետարանից, ոչ թե ընդդեմ, այլ հանուն գծատերերի էր: Վերջերս աշխատանքի պետական տեսչությունը երթուղիներ սպասարկող կազմակերպություններում ստուգումներ է իրականացրել՝ վարորդների աշխատաժամերի հետ կապված եւ քանի որ որոշ խախտումներ են հայտնաբերել՝ գծատերերի նկատմամբ տեսչությունն արձանագրություններ է կազմել: Հենց դա էլ ստիպել է, որ գծատերերը վարորդներին դրդեն գործադուլի եւ դադարեցնեն ուղեւորներին սպասարկել:
